【禾稈冚珍珠】街坊版京林屋：大窩口又一驚喜甜品店！

大窩口真的卧虎藏龍，同一個月，三次過來覓食， (鮑記大食部、恩HOMEMADE) 三次都有驚喜， 同一條街滿足我三個食慾！！

朋友推介我:「依度抺茶一流，窩夫超值，雖然質素唔係最好，但一定好食過荃灣Sugarxxxx，同Beaxx嘅窩夫，佢哋要成六十蚊，又難食。」(係真唔係呀？)

老實說，若不是朋友推介，Ideas Dessert的門口絶不吸引. 但食完Woo~真心覺得:禾稈冚珍珠.

抹茶焦糖燉蛋 ($36)

我真的好鍾意睇人燒Crème brulee，極治癒...…尤其連女神嘉欣BB都默認有BB，失落得更加要治癒，如果可以自己燒，一定醫得更徹底。

雪糕其實有4款選擇，我最討厭食思樂冰一樣的雪葩，不過阿太鍾意，否則一定轉超正抺茶味。

第一次食抹茶Crème brulee，超超超濃抹茶味，燉蛋又滑又順，正到不得了。

 一邊食一邊咀噏噏的阿太:「睇個顏色怪怪地，原來咁鬼好食。」(我:係！！堅好味至啱！！)

之後我點了最店受歡迎甜品第4位：芒果窩夫配雪糕 ($46+$4轉抺茶雪糕)

阿太:「點解你唔揀第一位雪山呢？ (我:因為我唔鍾意食冰囉)」

我問David:「你哋啲抹茶好正喎！係咩品種？」David:「老闆入嗰隻叫山政小山園，都係京都宇治嘅。」

窩夫即點即製， David:「我哋加咗珍珠糖先焗，大約焗4分鐘。」

一邊焗， 一邊已經傳來陣陣窩夫牛油香...… (嘩！！真．仙氣出現)

原來這裡是去年8月1日才開業，David說:「我哋12月開始做埋焙茶，有時間可以試埋喎。」

吓？？ 你早一點告訴我？？！ 我當然有時間，不過剛剛食飽午餐，個胃無空間喎。唯有下次再試。

最後David再加芒果粒、芒果醬，大功告成！我忽然覺得黃加綠，原來可以靚得如此緊要喎！！

小山園的味道，簡直可以媲美京林屋，這個抺茶雪糕，超正！一邊食一邊感受到今日有如執到寶一樣。

阿太問:「點解係似京林屋，又唔係中村藤吉呢？」很簡單，因為這裡和京林屋一樣，不用排隊、不用等位，超爽！！

濃茶夾回甘的雪糕，再食一口甜甜地的芒果粒，嗚！！ 超滿足...…應該滿足過阿BU食咗利君牙...…先苦後甜無得輸啦！！

不過，飄著香氣的窩夫，有點硬，本來預計的外脆內軟呢？？？失散咗？？ 4分鐘的烘焙時間，減一分鐘會不會好少少？...…

還是我拉住David傾傾傾累事呢？？

可能有時缺憾美也是一種美吧！下次就來食一個焙茶雪糕的3分鐘窩夫吧！應該就是我的Perfect Match。超期待！！


Ideas Dessert
地址：荃灣荃貴街10A號富麗花園商場A座地下13B及15號舖

大仁生活