粵語正體皆筍盤　教局氹你落返車（陳爍）

習近平大帝龍椅坐暖，連帶特區各大小部門不分強力弱智，紛紛亮劍宰割港人、娛樂主子。其中教育局就上演緊「更新中文課程」戲碼，名為公眾諮詢，意在硬銷簡化字、普教中（普通話教中文），配合「國家」十三五規劃、一帶一路戰略，促進中港融合。

研究早已證明，轉用普通話教學，學生成績明顯退步；簡化字破壞中文造字結構，更不利學童認字。此等政策割裂文化，背離學理，違反常識，不學無術，於理不合。教局唔敢再提成效，而係講另一套說辭：大陸地區、台灣以至世界各地華人社區，都用緊普通話或簡化字喎，廣東話、正體字得本地先會用架咋。唔改變就係固步自封，要跟上大勢所趨，先可以「加強與內地、海外各地的溝通」。前語常會主席程介明更曾大放厥詞：「香港以廣東話作為母語教學，只有死路一條！全世界好少地方以方言作教學語言！母語政策好似自殺政策！」

教局將廣東話、正體字同其他語言擺喺對立面。乜唔滅晒課堂上嘅廣東話，學童就唔會識得講普通話咩？事實上，好多港人喺港英時期接受廣東話、正體字嘅教育，及後返大陸傾生意，寫簡體文書，依然暢通無阻。學套新語言，只需幾個月嘅浸淫就能掌握，何況香港學校本身設有普通話堂？偏偏有啲家長，情願犧牲仔女正常學習，送佢哋入「普教中」學校、大陸交流團。究其原因，佢哋都會學教局噉話：「廣東話得香港人用架咋，學好普通話，同大陸溝通到先會搵到食！」普通話堂教唔好普通話，一定要取締正常教學語言先教得好？佢哋諗吓都懶。

用緊廣東話嘅人口有一億五千萬。喺廣東、廣西以至大馬、各地唐人街，廣東話都係常用嘅語言。撑廣東話、正體字，有好多實際嘅原因，例如學習成效真係比較好，學習古文較為有利。點都好，就算得香港七百萬人用廣東話、正體字，就代表我哋要放棄佢？

放棄廣東話、正體字，唔單係放棄日常嘅做法，更係放棄我哋嘅文化、我哋嘅根。每種語言源起，同當哋文化有密切關係。魚蛋、燒味、雞蛋仔，令人食指大動嘅港式美食；波士、的士、貼士，香港中西交匯嘅獨特文化；茶記、麥記、伙記，親切近人嘅每種稱呼。想像吓無咗廣東話、正體字，香港引以為傲嘅霓虹燈招牌變咩模樣，連食餐飯、望吓餐牌、叫碟餸，都會陌生到可怕。

正體字、廣東話，係香港文化魅力所在，而魅力源自我哋嘅自信。我哋用嘅正體中文，大陸人通通睇明，而且欣羨不已。我讀中醫嘅大陸同學，羨慕我哋輕易睇得明古籍，隨手寫得出正體字。港人譜廣東詞，半斤八兩、海闊天空、獅子山下，寫嘅係香港仔嘅生活百態。唔國際化，但就可以膾炙人口，以至傳遍世界各哋，繞樑至今。唔需要怕人哋睇唔明、聽唔識。用自己嘅語言，自然可以將最靚嘅人面描繪出來。

好多時候，我哋撑廣東話、正體字，都會引用古文淵源、粵語人口、聯合國地位。其實件事好比鄭人買履。買對鞋，無須度咗自己對腳幾長幾闊，先知啱唔啱着。直接著住對鞋行幾步，一定試得最真；用自己對腳試，一定好過人哋對腳。母語最得心應手，天經地義。為咗氹你，教局會吹到天花龍鳳，但即時全世界都唔再用廣東話、正體字都好，喺哩度香港，粵語、正體無可取代。天打雷劈都要珍惜，要守住我地寫嘅字、講嘅話。

作者：陳爍（本文章由聚言時報授權提供）