【情人節預告？ 】太古賞櫻遊 2016：成雙成對得2粒

我家的杯緣子專家說:「去影櫻囉...…U話太古城2月頭開花啦， 依家2月中應該有好多， 我要同緣子影靚相呀！」

所以， 今日一家三口， 情人節前夕出發太古賞櫻！

去年我們第一次賞櫻， 就入了長洲關公亭. 雖然亭前4棵櫻花樹只開得一棵， 但50人圍著花海也算熱鬧. 今日阿太問:「鰂魚涌海濱花園點去架？」

幸好上次跟同事M去過公園的「葛量洪號滅火輪」，所以今日好神氣答:「溜冰場上一層， 向右一直行， 太古城中心四期樓梯落，去公園再靠右邊上迴轉天橋，跟住我啦...…」

當我們途經天橋， SY看到杜鵑就說:「係咪影依啲花呀？」我搖搖頭...…SY又說:「花有乜好影？ 我想打卡機呀」

落橋後， 阿太問:「真係有隻消防船係右邊喎， 不過網話係北角方向...…」路在口邊， 最好便是問人， 剛巧有位護衛員叔叔主動走來。

叔叔:「如果係櫻花樹， 你哋沿左邊直行3分鐘啦...…但開咗啦咩？ (我:個網講架！)， 會唔會睇錯上年， 我頭先都唔見喎」(驚驚地~)

突然很聽話的SY， 真的拿手機來計時...但我們一直向前行， 3分鐘...3分半鐘...4分鐘...SY忍不住:「邊度有花呀？ 我好攰啦...又熱」

其實我自己也覺不對路...於是又問更亭的姨姨， 對方答:「今年無櫻花呀...全部都仲係樹枝咋， 無開過， 你係米被人呃咗呀？」

阿太很不滿:「乜個U咁鬼衰架， 又話新年過後有， 全部都係樹枝...以後都唔鬼睇佢」

這時我叫SY指一指淒淒楚楚的樹枝合照的同時， 我發現在SY身後有一位姐姐不停用手機影影影...

「哎呀！ 哎呀！ 有花呀！ 阿太...…真係襯晒情人節呀！ 有一對2粒櫻花呀」 我大叫...…正在打花的姐姐接口:「今年真係得依兩粒花咋...前幾日D人都係圍住影依兩粒...」

阿太:「吓？ 得兩粒花仔， 我都費事攞D緣子出嚟...費料」. 有兩粒總好過一粒都無啦。

SY悶到發慌， 不停玩沙踢泥 :「爸爸！ 你兩粒花都影咁耐嘅？ 好熱呀！ 我想飲汽水。」

姐姐臨走前說:「遲多兩個星期， 你再嚟啦， 你睇棵花都結晒冧， 應該遲D會有好多花架...…」(哦！ 不過我遲D都係入長洲安全啲)

離開兩粒櫻花， 我們又順道走上不再出海， 鮮紅色的「葛量洪號」滅火輪參觀一下.

由1953至2002年間， 這艘全亞洲最大滅火輪， 滅火無數...我叫SY:「不如你去支大砲度影張相啦」

SY左攪右攪， 望一望簡介大叫:「爸爸！ 依度寫係水炮， 救火點會發大砲呀？」 (係咩？ 你又知...真係乜都識依家)

原來最初滅火輪是放置於馬灣， 不過因為沒有人願意承擔維修費...…但現在放在太古， 點解又會有人肯付款維修保養呢？

葛量洪號的休息室可以進入...但就沒有任何歷史藏品， 會不會有少少可惜. 如果有當年的報紙， 消閒玩意， 或者相片都好.

原來救護室真的有部份展品， SY好興奮:「你估下個水龍頭有冇水出...(我:梗係無啦！)..有喎...(真係架？)...呃吓你啫」

原來， 滅火輪逢星期六、日下午2時30分提供導賞服務， 所以在參觀廚房時我聽到導賞員說:「以前我煮飯畀大SIR食....」

SY:「走啦爸爸！！ 我好口喝， 又好熱， 同埋依度都無嘢玩...」於是我們便正式拜拜滅火輪， 拜拜櫻花.

事後SY問我:「其實今日嚟太古做咩？？ (我:影櫻花？)， 吓？？你唔好講笑啦， 屋企棵花仲靚， 仲多花啦， 依度得2粒…...」 (屋企係桃花咋喎)

大仁生活