【辣火焚身】拜會聞名半山川菜

除了煙酒癮，本人最難抗拒的，就是辣癮。公仔麵加指天椒是常識，牛腩河無落辣椒油寧願成碗倒左佢唔食，日日無辣不歡。當辣癮大發時更加典床典蓆，辣火焚身。為了平息辣火，是日就選擇了High High地嘅三希樓。點解話佢High呢？一來佢位置已經夠高級，餐廳位於屬半山的麥當勞道，附近全部係豪宅，無車階級要上來就要去中環搭的士，咁高人一等嘅位置，食物價錢當然心中有數。不過作為嗜辣成癮的Spicy Girl，無論如何都要「會一會」名氣迫人、以辣聞名的三希樓。

三希樓馳名水煮魚

三希樓提供川菜菜式，主要菜式包括口水雞、水煮魚、脆皮炸子雞、樟茶鴨、蘿蔔豬骨窩，亦有麻辣火鍋。雖然我都係「邊爐精」，但今次含淚放棄麻辣火鍋，就係為了一試佢馳名嘅水煮魚。三希樓的水煮魚可選桂花魚或野生魚。我當然點桂花魚，即係咁，食水煮魚唔用桂花魚，等如王家衛開戲唔預梁潮偉，無可能架嘛，絕配既嘢「無奶油」胡亂拆開，因為我想像唔到甄子丹做黎耀輝同哥哥hehe，我諗我會打爆嗰Mon。

又扯遠左，都係講返條魚先，KO其他菜式後，終於等到主角登場，賣相同其他餐廳差不多，都係大大盤紅噹噹指天椒完全覆蓋啲魚片。

味道方面，夠麻夠辣，魚肉嫩滑，辣得來沒有搶了魚肉的鮮味；但麻的感覺在唇邊徘徊，食左兩舊，嗰咀已經腫到變阮兆祥，非常過癮。加上盡吸辣湯的墊底粉皮，煙煙韌韌有口感，仲可以俾錢追加，確實大滿足。總括來說，呢條魚係可以Encore的。