同事為滿足八卦 可以去到幾盡？（90後在胡說）

日常生活，大家不時會遇到好奇心強、八卦非常嘅人。小弟都唔例外，有位同事嘅超強好奇心，實在教在下大開眼界。唔好問我佢嘅真名，且叫佢做ET。

ET好關心同事，無論出身、家庭、私生活等，佢全部有興趣，而且是越知得多越好。有時我懷疑，佢連人地底褲顏色都想知。有時我諗你不如轉去HR，或者去做私家偵探…

當然，只講咗個大概，不足以了解佢八卦程度。例如，有次同事一齊食飯，講起去旅行，佢突然冇啦啦問我：「XXX，你有幾本護照？揸邊本護照？」我心諗，你hi大咗？你以為自己邊個？CIA？定FBI？移民官都唔會咁問人啦下話？好彩，兵來將擋，水來土掩。見招拆招。我隨口答：「其實我斯諾登啲friend黎，閒閒地都陀5、6本passport。」成功令佢冇癮唔再問落去。

有次仲痴線，話說某某男同事自爆琴晚好夜訓。咁ET就即問做咩黎，男同事就答：「其實冇做咩，只係訓係床到同老婆傾計。」點知佢下一句就問：「咁講啲咩？」吓？？！！！唔L係掛？咁你都想知？

當我以為見識哂佢最八卦嘅程度係點，事實卻是：少年你太年輕了。

某日，公司新來嘅女同事同我講：「XXX，講個秘密你知，其實我想quit啦。」咁我都好識做，聽完就算。點知，當女同事入去同老細講，老細大聲講：「吓！又quit？你地個個走哂點搞……」ET即刻着哂燈，成個人食咗興奮劑咁。老細跟住同女同事前後腳離開office，我估應該係去了解下件事掛(其實都唔太關我事啦)。ET就開始騰出騰入：「佢地去咗邊呢？office 唔係好大姐？去咗meeting room？」跟住佢就打電話俾清潔阿姐：「喂？蓮姐？見唔見老細同YYY佢地？YYY佢話劈炮呀！你無見過佢地？你見到佢地打俾我！」然後佢再黎個華麗轉身，成功轉行做實Q，比馬迷更專心望住部電視。無錯，就係CCTV。

點知蓮姐表示行哂成個office building 都見唔到老細同女同事，ET實行轉工轉到底，巡埋樓，差在未簽簿。結果都係揾唔到佢地，ET仲係唔甘心，就話：「去佢地個位睇下銀包係咪到，唔係到即係佢地出咗去食飯啦！」然後就行咗去女同事個位到……

大概，佢可能係我呢世人見過最八嘅人。而佢自爆結咗婚，我諗佢老公都算得上係位奇男子。

作者：90後在胡說（本文章由聚言時報授權提供）