【食譜】青紅蘿蔔印度椰子瘦肉湯

嗰日係果欄買印度椰子時，店長姐姐俾左幾個印度椰子嘅湯水食譜俾我，既然買左咁多粒返屋企，緊係密密煲佢唔好浪費嘛，所以就買齊材料，煲返個青紅蘿蔔印度椰子瘦肉湯潤返下先得。

青紅蘿蔔湯我就成日都煲，因為老公係好鐘意飲依個湯，作為一名間歇性嘅賢妻，有時候都係要投其所好嘛！

青紅蘿蔔再加埋印度椰子會係啲咩味？青蘿蔔本身個味都係幾濃，一齊煲又會唔會蓋晒印度椰子？我真係滿腦子疑問。

不過....…自古成功在嘗試，再加上店員姐姐俾得我都應該係信得過，所以就唔理咁多，買齊材料試下啦！

材料：

印度椰子　一粒

紅蘿蔔及青蘿蔔　各一條

豬肉眼　約$40

南北杏　約一湯匙

做法：

1. 先將印度椰子切片，青紅蘿蔔切塊

2. 乾淨南北杏，瘦肉洗淨汆水備用

3. 煲內放約1.5L水(約有15個飯碗左右啦)，然後隨水將所有材料加入

4. 待水滾後慢火煲約2小時

5. 最後加少少鹽調味就飲得啦(由於青蘿蔔本身都係濃味，所以真係唔洗落太多鹽呀)

其實我都有一刻擔心個青蘿蔔味會蓋晒印度椰子，但一飲落又即刻解除左我個擔心，原來佢地兩個係好夾嘅朋友嚟，啖湯除左有好香嘅椰子味之餘，都仲有青蘿蔔獨有嘅甜味，總之都係嗰句：好好飲呀！

(哈哈哈...…又有人唔知醜...…自己讚自己啲湯！)