鼓手嘈到拆天　與當局者迷現象（明月）

小弟由中學開始夾Band，鐘意聽60年代到80年代嘅Rock。

由第一次入Band房夾歌到今日，都發現一個近乎係約定俗成嘅現象：十個有八個鼓手都會打到好大聲，往往要結他、Bass、Keyboard配合推盡個音量，而主音就變成好細聲（因為Mic唔可以推得太大聲，否則會有Feedback）。最後結果，就係大家一齊係Band房製造噪音。

夾下夾下，我都已經搞唔清係自己有問題，定好多人集體有問題？

舉個例子：

由1:01開始，就近乎聽唔到結他聲、Bass聲、女主唱把聲，全部都被鼓聲蓋過哂。鼓聲過大呢個現象唔單單係錄音器材、場地嘅問題（當然簡陋器材會有影響），亦絕對唔係某類Band或某位鼓手嘅問題，而係香港夾Band常遇問題，小弟係唔同嘅Band房、Band Show同Video都見識過好多呢啲情況，Live嘅鼓聲遠遠大過Studio version，但係偏偏好多鼓手都唔覺得咁樣有問題，甚至發展到有一半Band友都習慣左咁樣嘅Sound balance，再成日畀好多藉口叫其他人去接受。

理論上，一個好嘅鼓手，甚至所有樂手都係，除左要岩拍子，仲應該識得控制打法，根據首歌嘅情感同埋整體嘅sound balance黎調節自己嘅音量、力量。但實況係，好多打鼓嘅人都經常用盡全力打落去，忽略整體嘅sound balance同首歌嘅結構，彷彿愈大鼓聲愈好聽咁。換轉係Classical orchestra 入面，如果個敲擊手下下都係咁大力鋤落個Timpani到，個指揮應該會「調教」到佢飛起。

「當局者迷」現象只會愈踩愈深？

有時我都會同啲鼓手分享下我呢個睇法，當中有部份都會同意，從而有所改善，但更加多嘅情況係，唔少鼓手已經練成左個習慣改唔到。更甚者，最近有小弟同一個鼓手傾過類似話題，佢嘅態度係：應該由其他樂手配合鼓，而唔係鼓配合其他樂器，直言如果有人教佢點打，佢寧願唔玩。

相反，打鼓初學者同中階者係最少遇到呢個問題，只要同佢地講一次「可唔可以打得輕手啲？」通常就解決左。是故，小弟成日覺得如果要夾The Beatles、The Doors呢類非重型音樂，同個中階嘅人會比打鼓高手更加容易夾到個效果。

所以小弟有時懷疑，到底係咪通常打鼓嘅人會愈練愈深入，去到一個忘我嘅境界，任何歌都選擇全力以赴、用盡力打，再將呢一種態度教畀自己嘅學生，令世世代代嘅鼓手都覺得打鼓嘈到拆天係常態？繼而睇得多Band show嘅人都潛移默化，接受左無論係夾Pop、Rock、Funk、Metal都好，個鼓 一定要好大聲？

到底Band友呢一種態度，係咪所謂「當局者迷」嘅現象？

或者問下自己，如果有隻album 係咁嘅mixing賣出街，有無人會鐘意聽？

後記：

1）其實唔係特別想搵某隊band嘅Youtube片，因為有唔少嘅香港Band都有呢個情況。咁岩用小紅帽呢段片，只係講表達Metal band以外都有呢個情況。請勿見怪。

2）利申：學過Percussion。

作者：明月（本文章由聚言時報授權提供）