香港人工時長、OT多都唔係一朝一夕嘅事，不過最近政府統計處發佈最新數據，表示今年第二季本港有2.42萬人每周工作75時小時或以上，最係五天工作就每日最少15小時、或者六天工作每日最少12.5小時。

當然有好多老細會話：香港要靠搏先可以維持競爭力、日本都係咁捱法、或者以前香港都係咁樣捱到有依家地位。不過如果再睇清楚所謂理由的話，就唔難發現所謂嘅理由，都只係一知半解下嘅謬論。

OT做完得個桔 何來有心幫你做？

第一，香港以前啲人OT都肯制，好大原因係以前OT後的確會有成果出來：Bonus、雙糧都真正同業績掛鉤、甚至OT都係真正咁你OT幾耐就計返鐘補俾員工。但就係1997年金融風暴，當時一句共渡時艱就取消咗OT呢回事。不過大家當時都話：Fine，捱過今次，之後就會變返以前咁樣。

結果筆者自己親眼見過好多公司個「時艱」由97年到依家2014年都仲係度「共渡時艱」。好彩嘅，無補水但有補假，但係工作多到做唔晒情況下，有補假又點會放得到？最後打工仔又係得個做字。咁樣落去，仲邊會有人OT兼肯花心機幫你執好啲野？做完就放工閃人喇！

講日本就要講全套 孭鑊自殺你做唔做得到？

然後有商家佬會話：日本人都咁肯搏，但係佢地只睇到人地工時長呢部份，卻無睇到成個體制：過勞死會被當成為公司賣力嘅榮耀、做到夜第二朝無精神，係Office中眼訓，係當做為公司做野而體力消耗過度嘅表現。而最重要一點，就係日本公司公層甚至老闆，係出事個陣都仲有一種責任心要負起全部責任、甚至感到羞愧而自殺。

不過香港班老細，你唔唔話中眼訓會當你太賣力，剩係要佢孭返自己隻鑊呢下都難過登天。

以量取勝時代不再 何不轉型質素先行？

去到最後，就要講下點解香港以前，單係靠搏就可以搵食。以前香港靠生產業搵食，不論老細同打工仔都係多勞多得。

但反而到21世紀，香港早就已經轉型，單靠數量同死做爛做已經唔再保證有錢賺。香港人自然要學識，點樣將力用係重點，搵出可以用一個工序，就可以得到人地做三樣野成果嘅方法。咁樣嘅可以慳力，又可以得到相對成果，何樂而不為？

所以香港人，係時候轉換一下做法，唔好以為做得多、肯OT就叫做好一回事，而係要識得將力運用係適當地方之上，令自己可以運用最少勞力，但得到最大成果，先可以叫做成功。

（以上提及方式並不代表所有工種適用，請視自己工作種類自行斟酌）