【湯水】滋陰潤肺：印度椰子栗子瘦肉湯

早係幾個月前煲過印度椰子清潤湯之後，真心覺得係好飲，所以成日都想買嚟再煲過。

終於我今日買到又平又靚嘅印度椰子，所以就即刻去買材料，煲依個印度椰子栗子瘦肉湯啦～

其實依家好多地方都有印度椰子買，就好似我屋附近個街市，其中兩檔濕貨雜貨店都有得買，不過唔知係唔係太多人買，所以佢提高左個價，我記得上次我都只係$50買到兩粒，依家佢地分別要30-40一粒，真係唔多抵，所以我情願唔煲住，都唔買貴貨(哈哈哈...…好一名師奶仔)。

今日帶小小豬去上興趣班，路經果欄當然入去八卦一返，生果我就冇買到，反而見到有印度椰子買，大大粒都只係$20，仲俾我任揀，當然係要即刻大入手買返四粒啦。

印度椰子有助清燥熱、止咳功效、滋陰補腎、潤肺養顏、強壯身體機能嘅作用。

栗子就有助補脾健胃，再加埋果皮同百合一齊煲，對潤肺止咳係好好呀！

材料包括有：

印度椰子　一粒

栗子　　　半斤

紅蘿蔔　　一條半

豬肉眼　　約$40

鮮百合　　兩粒

果皮　　　兩小塊

做法：

1. 先將印度椰子切片，可以的話就切薄啲，咁就煲時就可以出味啲

2. 栗子去殼，浸熱水去衣備用

3. 果皮浸透去囊，百合洗乾淨，紅蘿蔔去皮切塊，瘦肉洗淨汆水備用

4. 煲內放約1.5L水(約有15個飯碗左右啦)，然後加入果皮

5. 利用大火煲一陣，待水滾後加入所有材料

6. 再一次滾起後，後轉用慢火煲約2小時

7. 最後加少少鹽調味就飲得啦

既有超香嘅椰子味之餘，又有少少栗子味，所以真係啱晒椰子控的我同埋栗子控嘅小小豬。

就連老公都大讚啖湯好清甜，今次真係一次過滿足晒我地三口子嘅口味，小小豬飲左兩碗，我地大人就飲左三大碗，真係超飽呀！