【美孚】饒宗頤文化館：樂在棋中桌上遊戲展

早前去參加樂在棋中試玩活動時，知道佢地係饒宗頤文化館會有一個桌上遊戲展覽，除左睇展之餘又有得姐姐教玩棋。

小小豬一向都係佢地嘅粉絲嚟，所以就帶佢去玩一轉啦。

饒宗頤文化館我都係第一次嚟，整體上個氣氛都係好清幽，係入面行一轉都真係人都文青啲呀。

係依個咁靚嘅環境下，其實都勁想影多啲靚相，不過心急去玩棋嘅小小豬呈現出一臉不願意拍照樣，我都知佢心急去玩，所以就直接去樂在棋中嗰個展覽室啦。

今次展覽係展出樂在棋中所有推出過桌上遊戲，其實大部分小小豬都已經擁有，仲玩到滾瓜爛熟。

所以當小小豬一入到展覽室就已經極度興奮，不停係度講依個遊戲係點玩，嗰個遊戲又應該點先嬴，總之就係度自我陶醉啦！

原來樂在棋中都推出不少桌上遊戲，佢地所推出嘅遊戲真係由4-99歲都啱玩，其中仲有一個係專為「老友記」而設，

而佢地宗旨就係創造優質親子時間，提升彼此關係。

當然只係參觀小小豬又點夠喉呀，佢仲去左試玩區同姐姐玩最新推出嘅《張保仔傳說2》添～

依隻豬仔玩完又玩，玩完一樣又一樣，每玩一個遊戲姐姐都好耐心咁教佢玩，係辛苦晒姐姐陪佢玩呀～

係參觀嘅同時又可以玩下簡單問答遊戲，之後就可以去玩扭蛋機，嬴取小禮物呀！

估唔到一個地方就可以輕輕鬆鬆消磨左一個下午，當然亦因為小小豬玩桌上遊戲玩到唔願走啦。

因為小小豬掛住玩，所以我地都未參觀晒整個饒宗頤文化館就要離開了。

不過依度環境咁舒服，而樂在棋中依個展覽展期係三個月展覽所以搵機會可以再嚟行過，等小小豬又可以嚟下棋之餘，到時一定要捉小小豬陪我影返轉靚相先得。

場地會有免費穿梭車來往美孚地鐡站，所以好方便呀！

提一提大家青年導師只會係星期六、日及公眾假期在場同大家玩遊戲，所以如果大家有興趣同小朋友去玩一轉，咁就要留意啦！