親子暢遊 AIA 歐陸嘉年華 2015

放假緊係唔可以留係屋企要，要同小小豬嚟個大放電啦，所以就帶佢嚟AIA歐陸嘉年華玩一轉啦~

今日我地仲約埋仁叔叔同埋Charlotte姐姐一齊嚟玩，有樣好處就係...…有人陪小小豬玩，我就可以輕鬆啲啦~

老公一聽我話去玩，第一時間就話...…你都唔夠膽玩Mach 5螺旋槳，去嚟做乜？哈哈哈...…

依啲咁重量級遊戲我就當然係唔會玩，不過入面都有好多輕量級機動遊戲，咁咪可以同小小豬一齊玩嘛~

今次係第一次見Charlotte姐姐，估唔到佢地咁投緣，一見到就拖手仔去玩啦~

係嘉年華內有某幾個位置係有飄雪機，定時會噴雪出嚟，製造一啲冬日效果，小豬見到就二話不說就衝去拍雪！

我地第一個玩嘅遊戲就係London Bus~

我地坐係巴士上面，係會向前轉轉……向後轉轉，看似冇乜特別，但其實有幾下都都落得幾急，都有少少離心力，兩位小朋友都話好玩呀~

之後我地就玩鞦韆，睇兩位小朋友表情就知...…有幾唔驚啦…...哈哈

玩完一樣又一支箭咁衝去玩啦~

原來兩位小朋友係衝去玩過山車呀~

千其唔好睇少依個鱷魚過山車，因為佢快得嚟都幾急，所以都係好刺激呀~

之後又再繼續玩轉轉圈，轉圈都唔算太急，只係玩場時小小豬話有少少暈。緊係啦...連玩幾個轉嘅機動遊戲，俾我都有少少暈啦~

之後我地就轉戰全港唯一戶外溜冰場，由於我真係完全唔識溜冰，所以就麻煩仁叔叔陪小小豬玩啦~

兩個小朋友坐係海豹上面，等仁叔叔推佢地，真係辛苦晒啦~

小小豬都有嘗試自己扶住慢慢行，不過都係行幾步就跌倒啦~

兩個小朋友都玩到褲仔濕晒，所以之後就玩返啲文靜啲活動，影下相先啦~

我地去玩下啲攤位遊戲先啦，一向唔叻玩遊戲嘅我都仍然係失敗，玩幾個都唔中公仔呀~

終於係依個碌波波遊戲中俾我打破宿命，中左個BEAR BEAR呀，真係勁興奮呀~

火車控嘅小小豬見到火車又點會唔想玩呀，好在Charlotte姐姐願意陪佢一齊玩~

係迪迪尼次次都因為多人冇玩過小飛象，今次見冇乜人排隊，小小豬又想要去玩一轉呀~

依個比迪迪尼嗰個真係刺激好多，因為一踩一下腳低嘅「加高器」，小飛象就會飛高，比迪迪尼嗰個高好多呀~

玩左咁多個遊戲都已經好夠，正當我地準備走嘅時候，兩位小朋友就俾超巨型充氣彈床瀡滑梯吸引住，所以就去瀡返轉先啦~

其實佢個瀡滑梯都真係幾高，我望見到有少少驚，點知依個大膽豬竟然一啲都唔驚，仲玩得不知幾開心添~

玩左大半日，小小豬啲電都應該放晒，所以佢就帶住超滿足嘅心情返屋企啦！

小小豬有幾興奮？

當DADDY放工返到屋企時，佢就開始NON-STOP咁講佢今日玩過乜，啲遊戲有幾好玩，佢嘅興奮程度真係令到DADDY話搵日再帶佢入去玩呀…...哈哈！