【上環】每日只得5個：神乎奇技的牛奶芝士餅，雙重口感，加倍好味！

話說上星期五(18號)凌晨， 只差1分鐘， 趕不及上載SY相片到「TOKYO MILK CHEESE FACTORY」官網， 做曲奇禮盒面層的貼紙...…氣餒到喊。

心諗:「係咪真係咁好食呀？」7分鐘就60個名額爆滿，而且睇官方Facebook，日日中午12點過後，一定張貼蛋糕售罄字樣...…

(大佬！你舖頭好似開12點喎！)

今日太婆生日，昨日預先致電店舖，店員竟然答:「如果你唔介意，11點半過嚟排隊就最好，因為好多人會係我哋門口等開門。」

店員續說:「艾登芝士蛋糕 (熱食)我哋已經返唔到貨，而牛奶芝士蛋糕(凍食)，每日只會返5個。(我:吓？我有冇聽錯？5個)係呀！唔好意思。」

為免今晚沒有生日蛋糕，於是我帶阿囝晨早11點，即開舖前一小時走到西港城排隊...…戰戰兢兢步出上環站，走到4號舖。

Yeah！我們排第一，不過……

一個人也沒有...…是否我去錯地方？ 我第一時間推門問:「請問買芝士蛋糕係咪出面排隊？ 點解門口寫「滿記甜品？」

店員:「啱呀！因為我哋同滿記合作嘅。」

如釋重負的我， 還未來得及跟SY解釋，人龍就開始陸續出現...…(嘩！ 好彩早多半個鐘嚟到，如果11點半先嚟，肯定唔會有機會買到。)

一到12點， 店員便打開門列隊歡迎我們入內...…我問:「係咪有海鹽/蜂蜜曲奇混合裝賣？」

店員答:「有呀！不過40片裝早幾日已經無晒貨，依家只係得返20片裝，但係每日都限量只有20盒左右，我哋都無預計咁受大家歡迎。」 

舖頭長期派出兩位女店員提供蜂蜜曲奇給客人試食，每次三份一塊，SY試了一次，大叫:「好食呀！ 爸爸可唔可以再攞？」

我對細膽的他說:「你去問姐姐，如果佢畀你，咁咪食囉。」

結果他真的走去再問...…可想而知， 他覺得這裡的曲奇一定好好味。

不過店舖銷量第一的海鹽味曲奇卻沒有提供試食，我問了兩位店員，也沒有答我...…奇怪。

沒有試食，就吃自己買的海鹽味，兩款比較，海鹽芝士雖然沒有蜂蜜味一打開袋，芝士味已經濃郁香噴噴，但我反而更愛不會太搶味的海鹽。

雖然，我不懂甚麼古岡左拉藍芝士，還是法國蓋朗德芝士，但後者更易入口，海鹽味道比蜂蜜味更純、更清，我愛海鹽！

之後便到今次的主角，每日限售5個的，牛奶芝士餅 Milk Cheese Cake (HK$180)...…

這個凍食的蛋糕，不得了。

最初，單單看外表，平平無奇，打開蛋糕盒又不覺特別香，還以為中伏...…

一切開便發現，上下兩層，又慕斯又混入芝士，好像很有內涵。

一啖放入口，簡直神乎其技，兩種不同感動，好似正在食雪糕蛋糕，底層似千層蛋糕，最表面灑上蛋糕碎，滋味到爆！！

全枱人包括我十分挑剔的母親大人，竟然也一致讚到天上有地下無。(不過，事實真係好鬼好食嘅～)

蛋糕在口中迅速溶化之際，我心就好後悔...…

「早知咁好食，今朝限一人買一個，我明明兩個人，點解唔買兩個呀！！ 蝕晒呀！！ 揼心口呀！！」

TOKYO MILK CHEESE FACTORY

上環分店 (滿記甜品)
地址 ： 上環西港城
時間 ： 正午12時至晚上9時


大仁生活