【情侶手工冬甩小店】叉燒、午餐肉都整到Donut？！！

冬甩都可以鹹食？ 阿太上星期話:「銅鑼灣有間新開嘅冬甩舖頭，有叉燒味冬甩喎，不如買返嚟試下啦」好有趣！！ 當然要見識見識一下。

於銅鑼灣地帶2樓，冬甩店舖不大，由一對小情侶合作，當我一走近，Goldie便笑容滿臉的向我推介:「會唔會有興趣試吓我哋自己做嘅冬甩呢？ 有鹹又有甜架」

(有呀！我專登走嚟食架， 我想要兩個鹹味嘅！)

Jacky:「不如一個叉燒， 一個午餐肉吖， 你想係度食定攞走？」， 我答:「我想帶個叉燒返屋企畀阿囝， 咁不如我個午餐肉就係度食啦。」

原來即場進食，Goldie會即時為你放入焗爐加熱，之後更會多添楓葉糖漿...…(E！ 我個午餐肉係鹹喎， 都加糖漿？)

Goldie:「係呀！ 你試下先啦， 鹹鹹甜甜好正架」

原來底層Goldie一早己經塗了糖漿，所以翻熱後更加脆口，(係咪加咗啲泰式辣漿呢？) Goldie:「我好鍾意食辣，所以自己調咗D辣漿」

(OK喎， 我唔食得辣都接受到， 成個冬甩D味都醒神晒， 不過小朋友唔食辣點算？)

Goldie:「咁可能要預先打電話畀我哋訂造走辣， 因為我哋全部廿幾個都係有辣嘅」

結果， 很愛叉燒的SY， 死頂吃了兩口， 還是抵受不住辣味， 而大叫媽媽:「水呀！水呀！」

結果，由我一人忍到口水流，3啖就KO了全部。

比較兩款鹹食， 叉燒的感覺勝午餐肉多多聲， 難怪兩位老闆都說:「叉燒係鹹食當中最多人買， 因為有肉地！！」

(你哋點諗到整鹹冬甩呢？)

Goldie:「我哋好細個就去咗加拿大讀書， 最鍾意食嗰度D楓葉糖漿煙肉，香港又無人賣鹹冬甩， 咁我哋咪諗到不如自賣啦！不過香港人嫌煙肉太油，所以我哋改良用叉燒， 我哋自己焗架，所以甜甜地辣辣地囉」

我可能有5年沒有走上銅鑼灣地帶， 原來這個場變得非常清靜...…(點解你哋會租呢個場？)

Jacky:「同人講地鐵站E出口一出對面就係， 而且呢區好多國際學校學生幫襯。」

(係！真係好多學生仔， 學生妹. 而且Buttery Factory對出走廊， 商場在柱位設了一些坐位， 所以坐低慢慢嘆Donut， OK喎)

因為怕鹹冬甩小朋友不太喜愛， 所以我也買了兩款新口味給SY試，朱古力波波Oreo bomb一早便估得到是SY的第一選擇。

SY:「好食呀！ 脆卜卜朱古力好食」

另一個酥皮冬甩，簡直連奄尖腥悶的阿太也大讚:「呢間舖頭賣嘅冬甩真係同食開嗰D唔同，無咁甜又特別，酥皮真係好食。不過，又話有叉燒、午餐肉？ 係邊？」

 (哦！因為知你鍾意食甜， 所以鹹味我捱義氣同你食咗啦！！ 下次有時間同你買返...…嘻嘻)


Buttery Factory
地址：銅鑼灣記利佐治街