網上唔止買到Likes，仲買到最佳員工獎 （扮工室政治）

而家好多公司係網上搞Facebook page 買Likes，結果整左堆台灣Likes、中國大陸Likes、菲律賓Likes，真係笑鬼死人。點知原來網上唔係淨係得Likes買。

話說啲餐廳最鐘意叫啲客填咩員工表現果啲，基本上都無人填啦，點知有名老屎忽就諗左條橋：「黎緊高層有空缺，邊個拎到每月最佳服務人員，就優先考慮佢。」

結果各員工使盡渾身解數啦，例如女員工向毒男發姣咁，點知好多時都俾一名平平無奇既員工贏到「本日最佳服務人員」，仲做到每月之星。

呢位星星員工10月就正式由分店一名小薯仔，升任至總店副店長。點知呢位星星員工由調任至今12月，佢之前做落間分店個意見箱仲每日收到大量推薦呢位員工為「本日最佳服務人員」。

老屎忽睇返CCTV，發現每日入紙都係同一班人嚟，再捉個星星員工出黎Chok，原來網上有得買「填餐廳意見表」嘅服務，呢位員工一開始貪平買左一年服務，升左職後唔記得左Cut呢個服務，結果東窗事發。

有網友問呢位員工下場如何？東家唔打打西家啦，佢仲要幾個月服務未用，轉一轉另一間餐廳，用返同一招，相信好快又升到職。