【湯水】止咳去痰超有效：桔餅止咳茶

自兩星期前小小豬病好左之後，雖然都係叫做好番晒，但啲痰同咳都仲未清晒，所以又試下煲新嘢俾小小豬試，估唔到勁WORK哦~

其實為了清走小小豬啲咳同痰，真係好多方法我都有用，我又唔想俾佢食藥，所以唯有煲多啲湯水俾佢飲，希望可以用最簡單同安全健康方法清清佢。

正當我打算再次煲係小小豬身上都WORK WORK地嘅蒜頭水時，朋友仔就介紹左我另一個止咳茶，話依個比較甜甜地易入口啲。

雖然蒜頭水小小豬都唔抗拒，不過有啲甜啲易入口啲嘅，又唔難整都值得一試，剛好屋企又有齊材料，所以就即刻煲嚟試下啦！

材料：

桔餅　2個(哈哈..因為上次煲桔餅湯用剩兩粒放左入雪櫃，今次大派用場啦)

蜜棗　3粒

南北杏　約1湯匙

果皮　　1小片

做法：

1. 果皮浸軟刮囊，其他材料浸洗備用

2. 全部材料放入煲內，然後加入水5碗

3. 待煲滾後，然後改用慢火煲大約30分鐘~

4. 之後用匙羹壓下啲材料，等啲味再出啲，然後再煲10分鐘，大約煮成一碗左右

咁就飲得啦~

當然，第一次煲我都一定會試左味先俾小小豬飲。認真講，入口第一啖都真係幾甜(可能我平日唔太嗜甜啦)，不過佢嗰一種甜味又唔太濃，唔會有漿住喉嚨嘅感覺。奇妙地過左一分鐘之後，覺得喉嚨位幾舒服，條氣好似都順左好多咁哦！

小小豬又點呢？甜甜地佢當然係話好飲啦，轉眼間就飲左大半碗了。飲完之後又真係發覺小小豬啲咳係少左好多，同埋咳嘅時候又冇乜痰聲。最重要係佢瞓著嘅時候全晚都冇咳過，我同佢都可以一覺瞓到大天光啦！(相信好多媽媽係會知道，小朋友唔舒服時，真係連我地大人都冇覺好瞓依個苦況呀)

依個醒目小小豬飲完之後已經同我講：『MaMi....下次我再咳呢...你都煲依個俾我飲就得啦！』哈哈哈...…好明顯佢係鐘意飲依個多啲啦！

BTW....雖然小小豬鐘意，但其實我都唔係幾想再煲囉，因為一煲就即係小小豬又要唔舒服啦...…唉！