【尖沙咀】MUJI Café & Meal 開新店！

放假的晚上，當然就是出動覓食的好時機，早上跟阿太說:「無印Cafe係尖沙嘴開咗分店， 不如今晚去食囉！！

我續說:「不過好似係海港城E家食齋㗎喎...…」， SY搭嘴:「吓？ 我唔鍾意食齋...…(我:不過佢哋啲蛋糕好好食㗎喎...…)， 好呀！好呀！我鍾意食蛋糕㗎！」

晚上走到海港城4樓， 重新裝修的無印更加有日系感覺， 走入店的左手邊， 就是全新的Café＆Meal MUJI。

望了一下餐牌的阿太， 很得戚對我說:「你又話食齋？ 人哋有雞， 牛， 豬， 魚...…你唔係見到人哋寫「素の食」就以為食齋呀？ 你仲話讀過日本喎，「素」係原味咁解呀...…哥仔」

心諗:「車！！ 一時唔偷雞啦妳...…懶叻」，快快想轉個話題的我:「阿囝， 原來有兒童餐喎，仲有橙汁，你要依個好唔好？」

SY看到隔離枱的漢堡包薯條， 他又想吃...…本來我想拒絕，但見很有趣，漢堡包中間的不是牛肉，而是燒大菇。(嗱！！我都話係齋啦！！)

薯條怪第一時間搶薯條食， 之後說:「嘩！爸爸， 你個包好香」

對！我也覺得，大菇燒得非常香噴噴，而且配上面的沙律，望住個包，我腦海忽略想起6個字—「好可愛呀！！衰鬼」.

銅鑼灣分店是自助形式購買， 而這裡則是餐廳落單點食物，嘩！8個冷盤，9個熱食，今晚我們各選兩款，真的心大心細還未決定得到。

差不多吃完兒童餐的SY:「你哋仲未揀到呀？」

四品料理$108，全晚最最最驚喜，(絶對Juicy過城城公開戀情)，一定是「腐竹長芋豆乳雞湯」。

好純、好足料、好入味、好令人懷念、好有阿媽Feel，就是這杯雞湯的「飲後感」。

SY:「豆漿咁多渣？？」(大佬， 你真係唔識貨， E啲叫真材實料呀)

SY好開心:「有雲吞呀！！ (我:你試吓)」，不愛吃菜的小朋友，當然不太喜歡。

不過，腐竹包菠菜變成一隻另類湯餃，配上超濃忌廉味，雖然味道不是一試難忘，但忽然覺得這隻湯餃，溫柔過傳統的多多聲喎！

PS: 佐飯恩物「燴牛肉」，我忘記單獨拍照， 激腍，平時肉眼都嫌韌，無牙的SY，也撻了我一整舊來吃...…

阿太突然「喂」我:「你一定要試份黑醋豚肉，惹味到呢！！ 好食，真係好食...…」(不過我鍾意「燴牛肉」多D...…出色好多)

飲品...…飲品...…洛神花茶及生薑熱飲 ($42) 一樣放入半個雪梨，男人老狗不愛花茶，而經常薑茶當水飲的我，今晚發現—

原來薑茶入雪梨，開心過齋薑茶多多聲㗎喎！！

之後便是SY最愛甜點時間， 宇治抹茶紅豆泡芙、士多啤梨棉花糖、迷你酥皮鮮果撻。

泡芙皮略嫌硬了一點， 不過SY不認同:「最好食就真， 因為入面個啲嘢好似雪糕咁好食。」(車！！ 你甜品怪， 又係雪糕怪， 費事理你)

我愛那個菠蘿撻， 因為真的極舊原個菠蘿入撻， 而且這裡的撻就算夾菠蘿夾忌廉一樣輕甜..….好正呀！！

甜品怪投訴:「咁少嘅，又話有蛋糕，可唔可以再食呀？」

店員推介:「本和香糖布甸蛋糕，聖誕限定㗎」，正在偷笑的SY:「布甸好呀！我最鍾意布甸狗麻」

(阿囝...…唔係乜都布甸狗嚟呀！！)

一邊食一邊眼都會笑的小朋友:「布甸真係好食，爸爸！！ 原來出面係白朱古力嚟架！！超好食呀！」

(你鬼識食啦...…不過車厘子慕斯酸酸地， 夾布甸又真係幾吸引嘅)

捧住肚離開Cafe， 阿太大叫:「好飽呀！」我對囝說:「呻飢莫呻咩呀？」

SY:「『飽』...…不過真係好飽，(我：梗係啦~你甜品都食咗咁多舊)，食剩你會話我喎。」(你真係多辯駁……)

Café＆Meal MUJI Harbour City

地址: 尖沙咀海港城