每一個人都應該玩玩具（占米糕）

圖:溝神

八十年代，香港嘅工業其中一個主流係玩具生產，好多香港嘅玩具公司工廠都會接歐美玩具大廠嘅訂單，做生產、加工或者轉運，就好似最近幾年富士康接蘋果訂單造蘋果產品一樣。當年我阿爸嘅工作，就係負責將玩具送去貨櫃碼頭，再出口到外國。因為我阿爸係喺玩具公司做，所以阿爸經常會帶很多次貨玩具返嚟俾我玩，當然椰菜娃娃就靜雞雞平讓俾鄰居啦。當年大家人工都唔高，我點計都計唔到一家四口千零二千蚊點樣養大兩個細路，仲供埋樓添！以前一張大單，或者三兩張細單就已經可以養活一間公司，一張Mattel，或者孩之寶就生意無憂。但今時今日，公司搵埋都俾哂業主啦。

以前我仲係小學雞嗰陣我每個禮拜六都等著阿爸返來，睇睇有冇新玩具，而D新玩具正正係我做功課同溫書嘅目標，就算D玩具多到佔領書房，最多我出廳溫習做功課。睇下而家的小朋友，咩係佢地嘅玩具呢？主流好似只得電子產品同iPad，識得冼樸同星球大戰嘅分別就已經巧叻叻，你話figure？基本上figure算係擺設，玩味不足。你見過有咩細路通街玩陀螺，四驅車呢D玩具？睇怕TSA同嘉士伯一樣，可能係最多香港小學生日常最「益智」嘅玩具，啊唔係，應該話香港小學生普遍係TSA嘅玩具先岩。

現時香港嘅玩具工廠數目近乎零，玩具王國都搬上大陸啦。我發現，玩具喺八九十年代都仲係玩得嘅玩具，最近十年都好似係俾大人玩同炒賣：鐵人兄弟、Hot Toys、Michael Lau、Eric So呢一類玩具設計師，一隻figure都要賣到幾百到三幾千，試問一個細路點可能買得起。而且設計者都是做一D人偶，除咗欣賞做工，扭下關節之外冇咩可玩性，係俾大人嘅收藏品或者炒作。睇埋日本，日本都係一D性感女性人偶為主，超合金同機械人，都係幾百起標。玩具已經唔係小朋友嘅玩意，或者，小朋友對玩具不再有興趣。玩具只係八十後細路獨有嘅回憶之一。一兩蚊一隻發泡膠飛機玩一日？一張閃咭可以欣賞幾個月？一盒lego可以玩幾年？90後邊識。航拍就應該識掛……搞到香港玩具店數目少得可憐，生存到嘅都係靠炒玩具，或者賣埋精品文具、潮流電子用品等等維生，入面跟本冇小朋友。

八十年代頭，當年嘅童年都係睇美日動漫為主。日本動漫啱啱冒起，未成風氣。He-man、捉鬼敢死隊、忍者龜、星空奇遇記、Star Wars等80後好難唔認識。玩具商其後更推出一系列恐怖玩具，就好似：瘋狂博士、鬼口水等核突玩具。換轉而家，一定比班比怪獸更怪獸嘅家長們告到甩褲。社會唔知由幾時開始變成一個冇童真、冇創意嘅世界，一出世就注定要競爭先會有資格生存，一開始就要爭卵子、爭床位、爭奶粉、爭學位，學拿破崙話齋：Raw is War。所以年青人因為咁，先至唔知道咩叫「禮」、「謙」同「讓」，只係識咩叫「爭」、「偽善」同「絕」。佢地嘅通識係，「大愛如左膠，包容誠廢L」。我唔覺得出奇，仲有D「包容」，正如七十後唔識得八十後嘅創意，覺得八十後攪怪一樣。因為八十後係一個充滿想像嘅年代：穿梭機登陸過月球，然後會向火星同成個太陽系邁進；電腦除咗計數，仲可以上網同玩遊戲；一切以為去到極限嘅時候，偏偏又可以突破樽頸，去到一個全新領域，一切再重新開始。係一個凡事都有可能嘅年代，唔會好似「紅人」崔健話齋：21世紀仲唱緊20世紀嘅歌；雖然話好歌歷久常新，但我會相信明天會更好。唔好同我講香港樂壇，呢個係小圈子嘅成人玩具，一個反面教材。

以前D玩具大部份都係有諗頭、有創意同經過精心設計，唔似而家D手機遊戲，千篇一律，每天似交功課一樣咁登入，重覆做同一樣動作同埋不停叫人課金。我寧願幾百幾千蚊買一件玩具慢慢玩，都唔會俾個課金系統蠶食我嘅理財方針。玩具應該係要有啟發性，我地唔需要有一個電子屏，都能夠想像呢個係太空；我地唔需要電腦合成音效，用beatbox都能夠扮到飛彈音效；我地唔駛淘寶買服裝，用演技都能夠玩角色扮演。一切嘅分別就係小朋友「想像力」嘅分野——有想像力、有創作能力同洞察能力嘅小朋友，係設計玩具俾自己同朋友仔玩，而唔係單單玩玩具或者俾玩具玩。名人後代嚟講，小小超就係一個會設計玩具俾自己同朋友仔玩嘅人，佢唔只贏喺所謂嘅起跑線，仲跑得快過成日怨天尤人嘅「磁能線」跑手。

我地鐘意尋根究底同代入故事思考，點解瘋狂博士嘅化屍水可以化解物質？為何Starcom唔駛入電都可以有動力推動？點解手氣槍可以發射子彈？所有問題，自己去睇書或者拆昇件玩具黎尋求答案，今日係資訊發達嘅年代，求學更加容易。所以話，設計者唔只係一名科學家、物理學家、化學家，仲係一個藝術家。如果你依家仍然係度做玩具設計，請你諗下，你設計左咩出嚟。玩具設計唔單單係一份工作，而係一個啟蒙，知識嘅傳承，如果你用曾前特嘅口號做呢份工，你實俾人Ｘ到褲穿窿。

年青人睇睇我地是玩什麼長大的，一定會嚇你一跳。

如果小朋友冇想像力，童年就會留白。我地睇He-man、Marvel、Star Wars，我地會知道正邪，意識到世上有光就一定有影，有街燈就一定有暗角。我地也知道就算有父幹，亦都要努力維護，唔係就好似He-man咁，有個邪惡阿叔搶走你老豆留落黎既家產。我地幻想可以飛天、有原力、會氣功，俾著而家，家長必定同港女一樣一開始就秒殺小朋友嘅幻想，然後用幾十分鐘解釋，呢D係假的。現實係，你永遠唔能夠成為超人，玩具始終係玩具，點解佢地個玻璃心永遠唔敢承認，CCTVB同韓劇D劇情仲膠過膠造嘅玩具，睇完又盲信嘅人真係毒L都不如。但係玩具教曉你嘅係，你唔好好讀書，TSA考得唔好，大個就有機會好似忍者龜咁要住坑渠，食垃圾食物過日，成世做隻唔見得人嘅毒L縮頭龜，俾人鬧仲要笑笑口。就算你自我感覺良好，港女嗰份職業評分表都踩到應啦，你想好似E-kids首〈玩玩具〉咁同個港女唱〈做你愛的玩具〉？唱番PSY首〈Daddy〉打JJ好過啦。

而家小朋友太現實，幾歲已經識得用金錢交換想要嘅東西，叫咩等價交換；更加有小朋友為咗要喺虛擬遊戲裡面贏其他人，偷偷咁課金，贏輸對佢地嚟講係好重要，個趨向係病態到係「一次都不能輸」，而呢種觀念都係因爲遊戲為左賺錢，帶比你嘅錯誤，由具啟發性嘅玩具創作人變成一個無奸不商嘅千古罪人，令小朋友成日對著智能電話同平板電腦發呆，一直呆到成年。做玩具其實係良心企業，為咗投機炒賣賺錢而做嘅玩具，基本上已經同玩具呢個詞無關。希望鐵人兄弟、Eric So等人，賺夠錢，會設計真係俾細路仔玩、有創意同啟發性嘅玩具嘅一日。

作者：占米糕（本文章由聚言時報授權提供）