【米芝蓮得主】老闆之一單飛賣熱狗，好食到尖叫！

同事話:「你半年前介紹嗰間『叁薯』得咗米芝蓮呀」嘩！開心事， 即時要恭喜老闆之一阿Pan。

不過電話中的Pan答:「多謝你，不過舊舖我之前賣咗喇，E家我係紅磡賣熱狗呀！你嚟唔嚟試呀？」...…

我又怎會放過食新東西的機會？

開了兩個月的1987， 由阿Pan獨力經營， 他說:「這裡以街坊客為主， 以前水渠道就朝勝客居多， 客路完全唔同，所以紅磡區要慢慢儲客。」

(賣咗叁薯有冇唔捨得呀？)

阿Pan:「又無喎， 因為自己有能力繼續做， 本來E度係打算做分店， 7月走嗰陣， 我就攞嚟試下， 繼續滿足自己煮食嘅感覺囉。」

型男煮功了得， 全因為本身已經有9年做廚經驗， 由意大利菜， 發展至薯仔， 到今日單飛賣熱狗， 還要一出便9款HotDog。

「究竟咁多款，邊款最好食呀？ 阿Pan」

阿Pan:「我推介你食9號「醬爆班尼迪」，我一日都賣到30條架」店中王牌，果然非同凡響，同一時間又有另一位客人點選。

不過那位客人想要白牛肉腸，而不是豬肉腸，我問Pan:「我都想食粗D嘅腸喎...…」

忙於煎腸的Pan:「因為個班尼迪已經好多嘢， 如果你仲夾條大腸， 你會食得幾論盡， 信我啦...要返條豬肉腸啦」(我一定信你...…)

之後他用火槍將荷蘭醬燒了數秒 (好有氣勢呀！！)， Pan:「因為荷蘭醬入面有蛋黃， 牛油， 燒咗會更出味」。

我愛超多牛油， 所以阿Pan特別為我加重口味， 嘩！烘了的包， 加入超多牛油，老套說一句:「外脆內綿」。

又煙肉， 又腸仔， 還沾滿蛋黃漿汁， 豐滿入味的蛋汁...…

我寫文的一刻仍然回味當晚「食得滿足，食得感動，食得好快，食完啦？？好食到幾啖就放晒入肚...…」的感覺。

另一款「泰式酸辣蝦熱狗」，一樣是阿Pan強烈推介，「我試過用急凍蝦，但完全唔得...…E家用游水蝦，貴十幾蚊一斤架...…我情願賺少D都要用游水， 因為客人一定食得出， 又爽又鮮嘅分別。」

一向奄尖的阿太， 一口咬入熱狗， 尖叫:「嘩！估唔到酸酸辣辣， 好清新嘅蝦， 再夾埋隻熱狗嚟食， 好食， 真係超好食」

諗得出用泰式醬混HotDog創意驚人， 單單四隻大蝦， 已經一上枱就贏晒啦...…

1987還有意粉，本來阿Pan還推介我食「法國油浸鴨肉熱狗」，不過我不聽話，梗想試意粉...…

其實1987的意粉都好好味，但就沒有食熱狗，食到會令人尖叫的感覺吧。

(D畫你搵邊個畫架？)

阿Pan:「係呀. 全部都係 (你學咗好耐架？)，無學過架，貪得意。最攪笑D客讚我畫得靚，仲叫我幫佢畫...…我都唔知點答佢。」

(你畫D熱狗， 可樂， 簡直好似睇緊漫畫咁開心。)

(一個人做...…辛唔辛苦呀？)

型男Pan答我:「少少啦， 但之後可能下午茶時間會閂舖，休息個半鐘...…可能會掛張吊床Relax囉...…(嘩！正喎...街客瞓唔瞓得？) 係唔得嘅，畀我自己瞓啫……嘻嘻。」

加油呀！阿Pan！！ 你話我偏心又好...…加晒人情分又好...…1987的熱狗，創意味道絶對贏盡全區！

(大家嚟食， 記得叫老闆加多啲牛油...…超超超無敵)

1987Hot Dog

紅磡差館里21-27富業大廈地下5號舖