【夜光巡遊】任玩任食任影相 「堅靚」@ 渣打藝趣嘉年華2015

「希望唔好落雨， 希望唔好落雨」前晚我不停口噏噏。

SY:「爸爸！ 落雨又會點呀？」， 我答:「落雨咪無得睇靚靚「渣打藝趣嘉年華　夜光巡遊囉。」

一年飛快就過， 上年第一次睇預演， 突然又已一年...…去年同樣下著毛毛細雨， 巡遊如期進行。不過，今年巡遊取消了...吓？？？

本來極失望的入場…...誰知所有「夜光主角」遍佈維園任人集郵...…

嘩！真的天助我也...…我愛合照多於齋睇多多聲啦！！

我叫SY:「嚟啦！嚟啦！大公仔嚟啦……(SY:好醜樣呀！爸爸)」

工作人員:「小朋友， 你點知佢叫做醜公主嘅？」

(嚇死阿囝， 當他聽到原來姐姐知佢講隻公仔的時間...…嘻～嘻)

影完公主， 便影Queen of Night...…(唔！！口大鼻大的王后， 點解咁似我阿太呢？？)

不過整晚只有Queen， 沒見過King喎...…(莫非真的無得King？)

大公仔會發光， 1:1發光人同樣過癮， 我看到全晚最襯的發光情侶， 應該就是這一對。(我估咋...…根本是由兩位不同的設計師設計而成的)

Ms Fat 就是紫色捕鳥人巴巴吉樂的設計者， 她說「我有份幫手新年花車巡遊，所以大會今次再邀請我...…(好靚！你設計咗幾耐？)， 我攪咗成個禮拜呀！ 趕到我吖」(原來快工一樣出靚貨)

原來漆黑一片， 睇夜光雜技， 非常之正！！ SY:「我都想玩搖搖呀！」我一樣想試揈揈揈，夜麻麻揈著發光搖搖，發光掍特別靚。

有小朋友玩氣球， 等食爆谷， 已經沒有跟我去拍照……沒問題， 你不去更加好， 我自己和工作人員傾計……吖！

三劍俠臨離開前， 被我捉住， 我:「E條蛇嚟㗎？？」

工作人員:「係呀！！《鵝媽媽組曲》陶瓷公主中的蛇王子， (我都未聽過嘅)， 咁又係， 真係好少香港人睇過嘅」

藍色鳥人:「我叫森巴， 我頭頂隻叫大雀係嚟自〈一千零一夜〉， (乜你都有名㗎？ 咁勁嘅...可唔可以著燈呀？)， 無電呀！ 所以差唔多要收工啦」

明燈...…我終於不用問工作人員， 都識的唯一大公仔。

我教SY:「嗱！E個爸爸識呀！ 係阿拉丁神燈呀！」SY更得戚的答:「燈神吖麻， 我都識啦」(車！！)

本來SY想畫臉， 但因為我要等所有大公仔20:45離開後， 才到畫臉區排隊， 結果原來已經截龍...…

(好彩佢有波波玩， 有爆谷食，先無扭計...好彩！！執返身彩)

之後有一個氹氹轉， 菊花園， 我好後悔沒有走入去轉...…原來可以有相， 有20秒Video送給你.

SY一見即場電視機有自己， 便拉住媽媽:「我哋呀！！」...

不過阿太:「轉到好暈就真， 等你爸爸頭先一味仲叫我笑...…笑乜鬼吖！ 我有D想嘔添呀」(車...…我點知喎)

最後， 當然要到自拍館來一個難得家庭即影即有相....SY:「我唔要大隻佬...大隻佬無著衫， 好核突」

(如果我練到咁大隻， 我都日日唔著衫啦， 幾型呀！點會核突)

今晚「夜光巡遊」就此完美結束， 14/11， 15/11藝趣嘉年華一樣於維園有得玩...…免費玩攤位遊戲， 任食任贏獎品， 記得早少少入場排隊呀！

11月14日：10:00 – 17:00

11月15日：10:00 – 16:30

地點: 銅鑼灣維多利亞公園中央草坪

免費入場

夜光巡遊

日期: 14/11/2015 (星期六)

時間: 8:30pm-9:30pm

地點: 銅鑼灣利園一期至希慎廣場

壓軸巡遊

日期: 15/11/2015 (星期日)

時間: 3:00pm-4:30pm

地點: 銅鑼灣維多利亞公園至東角道