灣仔鵝頸街市，算是港島區馳名的市集，除了因位處灣仔鄰近銅鑼灣，交通方便外，食材種類多，價格相宜亦是原因之一。
而鵝頸街市的熟食中心，更是臥虎藏龍之地，咖喱羊腩、燒味、小炒同車仔麵，都各有不少粉絲，連報章雜誌都有多次介紹過。
雖然家住灣仔，卻已很久沒有上去熟食中心用餐了，而今次剛好與同是灣仔友的朋友說起，雙雙決定一起去重溫那些年的回憶。
到達後，發覺原來熟食中心已重新翻新，添加了冷氣空調，地方亦比之前乾淨了。
而因我們是在午市時段光顧，全場座無虛席，人客川流不息，搭枱是必然之事。難得揾到2個座位遂先坐低並著員工幫忙清理一下枱面。
熟食中心就是這樣子，如果你要舒適的用餐環境或殷勤的招呼，對不起，熟食中心一定唔啱你。但那種地道隨意，可一次過品嘗不同食店，碰面都是街坊街里的感覺亦是其他食市所沒有的。我和朋友分別叫了遠近馳名的咖喱羊腩飯和咖喱牛腩飯，加杯凍奶茶同凍阿華田。
咖喱羊腩飯
這裡享譽多年的名菜，較特別是打正清真食品的旗號，老闆信奉回教，所以這店絕不提供豬肉菜式。
多年來都堅持選用清真食品及處理做法，據稱經過清真處理的肉類會較一般為佳，宗教角度看亦較為潔淨，而這裡的羊腩是否因這個原因而特別好食就不得而知了。
咖喱羊腩飯一上枱，坦白説是賣相欠奉，但嚟得呢度食飯對這方面也沒有太大期望。
雖然冇賣相，但咖喱確是真材實料，類似巴勒斯坦咖喱做法，顏色金黃油潤，遠遠已聞到咖喱香，充滿濃濃香料味，令人垂涎三尺，用嚟送飯絕對可以食到一粒不剩，汁都撈埋。
而羊腩炆得鬆軟酥香，不會太辣，啖啖都充盈著咖喱香料和肉味，入味得連骨都要啜埋，果然是咖喱羊腩的經典。
咖喱牛腩做得同樣出色，咖喱汁同樣超級濃香，而牛腩比羊腩炆得更嫩更鬆軟，相信會是繼羊腩之後另一必然選擇。
以每碟飯盛惠$42大元的價錢，能食到這麼用心出色的咖喱，喺灣仔區來說算是合理，唯只是用餐環境比較擠迫市井，這方面要留待大家自己取捨了。
https://www.facebook.com/myplayground2015
