【食譜】哈蜜瓜百合瘦肉湯

依排小小豬真係湯怪上身，成日都問我幾時有湯飲，見佢咁鍾意當然亦都係我煲湯嘅動力。

行街市見到大大粒哈蜜瓜，醒起之前見上網見過朋友仔介紹過，所以就煲下哈蜜瓜百合瘦肉湯啦～

材料：

哈蜜瓜半個、

雪耳一朵、

鮮百合四粒、

南北杏少許、

瘦肉約$40

步驟：

１哈蜜瓜洗淨去皮去核切大塊備用

２瘦肉洗淨切塊汆水，鮮百合洗淨剝成一瓣瓣備用

３雪耳浸軟切塊

４煲內放約2L水，除哈蜜瓜外，將其他材料放入煲內

５水滾後先用慢火煲半小時，之後再加入哈蜜瓜煲一小時

６最後加少少鹽，就飲得喇

用哈蜜瓜嚟煲湯都係第一次，估唔到煲出嚟又幾清甜，加埋百合同雪耳一齊，真係既潤又甜。

難怪小小豬都飲左兩大碗，見佢依排咁鐘意飲湯，真係要勤力啲湯多啲飲先得。

既可以滿足一下依隻豬仔，又可以滋潤下打打底嘛！