【老區懷舊Cafe】中西合壁的好味道

星期日想慢活歎一歎， 我跟阿太說:「新蒲崗開咗間新Cafe， (太:吓！又去食嗰啲All day breakfast呀？)， 好似有中湯飲， 有雕魚燒」。

(其實食得多All day breakfast都幾悶。)

「窩子」店員超友善， 因為我不想在店外等得太久， 二人枱也強行入座。

店員拿走另一位女士的凳給我—「唔好咁...…人哋坐緊喎」。

店員阿邦答:「無問題， 佢係我同事嚟。」 

新蒲崗「窩子」由試業開始起， 只有一個月時間， 已經發展至坐無虛席， 周日輪候時間為30分鐘， 老區的新店來說， 「真係勁」。

阿囝指著餐牌:「點解咁多A， AA， A☆...我想食朱古力， (得A咋喎， 好水皮)， A係最叻㗎！」。

阿太:「哦！佢扮成績表呀！」(咁勁...…一科B都無， 14A仲勁過麥明詩。)

「窩子」很有趣， 每一張凳也不同款式， 這情況在觀塘 Oldish遇過一次， 而Oldish張張凳也是出售的. 這裡應該玩不協調吧！

坐穩後我第一句便問阿邦:「老火湯幾多錢呢？」阿邦答:「平日點Set才有飲品及例湯， 唔好意思， 周末就沒有供應」(極失望中)

「咖哩牛腩」配法包是阿邦的推介， 看來「窩子」很喜歡中西合壁...我沒有想過Cafe的牛腩一樣可以燜出超水準， 腍而不韌， 入味又不散， 配法包一流。

阿囝:「我想食多一塊麵包...…」真的如此超班的牛腩， 我應該可以伴2碗白飯。

點解得4片小法包...…唔夠喉呀！

阿邦本來推介我們「蕃茄雞肉扁意粉」， 但因為我怕自家製的蕃茄很酸， 所以改了野菌黑松露...…

果然好人提醒我唔聽， 自討粉吃...…還是那「咖哩牛腩」太好食， 比了下去呢？

阿太點了份洋金菊， 用來襯她的杯緣子， 可能花茶都是合女士們胃口多一點。

我的心一早已飛到雕魚燒甜品那裡去。

一說起雕魚燒， 我就想起大半年前紅遍整個油麻地的雕魚燒雪糕。

阿邦介紹:「我哋用了麻糬做外皮， 同出面有D唔同架」。

對！對！對！ 煙煙韌韌，絶對有咬口過普通蛋醬。

小小意見...…雕魚夾起放會好一點， 起碼賣相不至似一條死魚。

另外， 我想雪糕放在碗仔內， 就算遇上變態Blogger， 左影右影， 雪糕溶喺碗， 好過溶喺枱啦。

這裡很多舊時物， 扮懷舊？是不是集體回憶是潮流？

不過， 連我的年紀...…其實也沒有用過這款懷舊款式的收音機...…會不會回帶回得太前呢？

張保仔年代太久遠， 不如放台雅逹利， 黑白電視更襯這裡的黑白格地磚啦啦！！

離開時， 兩母子研究旁邊大廈， 太:「嘩！咁大塊廣告...…」， 囝:「係條褲嚟喎」...…計我話， 梗係風水陣！！ 「捐過褲浪都要入去買衫陣」就真.

窩子

地址 / 新蒲崗仁愛街