【飄來榴槤】蔫肨爛臭食罐頭

朋友報料:「有罐頭份子甜品食喎， 又咩魚子醬， 你去試吓啦！」 如此有趣， 當然即時要去影影影食食食。

走到廟街發現熟口熟面的舖頭名字， 這不是當年我走到元朗食盆栽甜品的店？ 原來搬了出來？

我問工作人員:「請問係咪有罐頭甜品食？」工作人員答:「未出街喎， 你可以預訂下個月有…...(甜品都要預訂？)， 依家只係得罐頭榴槤， 同埋只可以外賣...…」

(外賣啱晒！最驚榴槤， 就買返屋企被阿太試)　老實說我覺得似貓糧多過似罐頭。

臨走前口痕問廚師， 罐頭榴槤推出了多久， 他用奇怪眼神一望答:「差唔多一年啦！」(吓？咁耐架啦？我真係後知後覺喎)

不得不佩服這家甜品店的心思， 經常有新攪作， 用密封罐頭裝住榴槤， 有一個好處， 就是「一啲都唔臭」

不過當阿太一拉開罐頭， 「嘩！蔫肨爛臭到呢...…快快影兩張相我就要彈開抖抖氣。」

不過阿太竟然大讚:「真係好香喎！」(其實你識唔識得分香同臭？)

阿太一邊食一邊講:「好味喎， 真係貓山皇嚟架？」(佢話係D24囉， 我鬼識咩？K11我就知係邊)。

阿太繼續:「裡面好似有啲粒粒西米布甸， 真係好食， 係香不過不過舊榴槤咁鬼少， 細細罐， 幾多錢？ (我：$48囉)

你應該買兩罐畀我食啦， 一罐真係到喉唔到肺」

(咁不如直情買個榴槤畀你仲好啦！)

Sense Dessert Cafe

地區：佐敦廟街