沙參玉竹雪耳湯

在秋天將至，當然要煲啲清潤嘅湯水打打底。加上小小豬依排又勁鐘意飲湯，每次都飲兩大碗，所以又係一個動力令我密密煲。

今日就煲左好啱預防秋燥嘅湯，就係沙參玉竹雪耳湯~

由於雪耳係唔可以隔夜食飲，所以我都唔係煲左好多，大約係夠我地三口子每人飲兩碗左右啦！

材料包括有，沙參、玉竹、雪耳、南北杏、蜜棗、果皮少少及豬肉約$40，份量方面我就同藥材店職員講大約幾多人飲，佢就會幫你執所需份量啦~

瘦肉洗淨汆水備用~

果皮浸透去囊~

雪耳浸軟剪切塊~

煲內放約2L水，然後隨水加入果皮~

待水滾後加入所有材料，先用猛火煲半小時~

之後轉用慢火再煲一小時~

最後加少少鹽調味，可以飲得啦~

秋天係好需要預防同滋潤嘅時候，個底打得好，咁係冬天就唔咁易燥同爆拆，所以真係要趁依家潤多啲。

而且沙參能養胃津清肺熱，玉竹可潤燥止渴，雪耳滋補養氣。所以依個湯有潤燥滋陰，對皮膚亦有益，但如果感冒者就暫時不宜飲用啦！