合掌瓜馬蹄紅蘿蔔瘦肉湯

早幾日小小豬都唔舒服，食左幾日藥，人仔都即刻好似瘦左啲(可能係心理影響)。見佢有返啲胃口，即刻煲啖清清地湯，等佢補返下先，所以就煲個合掌瓜馬蹄紅蘿蔔瘦肉湯啦~

材料其實都好簡單，都係一啲合時嘅蔬菜，合掌瓜3個、紅蘿蔔2條、馬蹄約十多粒、瘦肉約$30~

其實如果用豬展的話，啖湯係會甜少少，不過始終小小豬剛病好，所以我就用瘦肉啦！

合掌瓜去心切開一半~

紅蘿蔔去皮切塊~

馬蹄去皮，依一個係我最討厭嘅動作，不過原來馬蹄可以清熱消腫散結，而且有助解鉛水毒(我都係上網睇到)，所以辛苦少少都要煲嚟飲呀~

瘦肉洗淨汆水備用~

煲內放約3L水，然後將加入所有材料~

待水滾後轉慢火煲一個半小時~

最後加鹽調味...…飲得啦~

有飲湯又可以將啲湯料當其中一個餸，一湯兩食真係啱晒我啲師奶仔呀~

味道清清地又有少少甜，都真係唔錯。依家啲天氣真係唔係咁好，加上又係剛剛開學，好多小朋友都好似小小豬咁唔舒服。真係要等佢地有胃口時煲返多啲清潤湯水，可以加強身體抵抗力，同時儲定啲能量留返唔舒服時用嘛！