何謂左膠文（KeeenT）

臨近928一周年，發覺好多人雖然知道啲左膠比人話左膠，但係都因為唔係好exactly清楚咩係左膠，覺得一犯錯就會比人標籤，結果以覺得haters’re just gonna hate嘅心態對待。所以特登再開個post講下何謂左膠。

首先，左膠呢兩隻字嘅重點在於個膠字。個左字可以唔洗理，因為政治立場左翼嘅人唔一定膠，而多數左膠其實只係膠，一啲都唔左。

而個人觀察，"左"膠係可以分成以下三類：

第一類實質上係港豬。雖然會參與政治活動，但係一樣政治冷感，好多連自己爭取緊乜都係一知半解。佢地當社運只係消閒活動，去示威係去行街見朋友。所以佢地會追星，對香蕉奶、 周庭、學聯hehe團呢花邊野特別上心，亦對唱今天我舉黃遮掛氣球之類嘅嘉年華式抗爭佢地好受落，去到佔領區影張相check個in唱下K畫下公仔寫句加油就覺得自己出左分力係民主鬥士。但係弔詭嘅係當佢地見到其他人夠膽衝時佢地會因為人多嘅安全感同埋從眾嘅心態而會跟埋一齊衝，928同圍政總時其實好多都係呢啲人。總之佢地一切嘅付出只求令自己自我感覺良好，而根據實際情況有冇需要。最終有冇成果佢地亦唔多care。佔領時金鐘果班反動嘅村民就係典形例子。

第二種係當社運只係一門生意, 所有示威都係為爭取捐款，選票或者知名氣。發起就係為左失敗，只要永遠失敗佢地嘅社運industry就可以永遠延續。佢地要你和理非非，乖乖地坐定定係度唱K，唱完捐完錢比啲掌聲自己就乖乖地番屋企。唔比你還手，唔比你矇面，唔比你升級，當有人做左啲佢地意料之外嘅事，佢地就會用盡一切辦法打壓呢啲人，例如對勇武嘅人割蓆畫清界線，譴責所謂嘅暴力行為，甚至向警方篤魁供出唔肯服從佢地嘅抗爭者，總之要確保場抗爭唔會失去佢地控制 (i.e. 唔會成功)。例子有泛民、學聯、 佔中三子等人。

第三種係真心膠。大多為有小眾偏好症嘅所謂文青或者學者。佢地對壞事做盡嘅大陸人就好大愛包容，香港人唔中意大陸人一定係歧視係法西斯。無論點抗爭者一定要對準政權，只要你唔係和理非非抗爭，你衝，你整喊細路女，就係輸左人格。而且不分是非黑白一定要團結。抗拒批評，自顧住自己朋黨嘅認同圍爐取暖，你批評佢地就係搞分化，共產黨會好高興，但係佢地批評你就係有批判思考，唔人云亦云。總之講嘅經常自相矛盾同double standard。例如 周保松，支持泛民雙學果堆純情中產等。

而以上三者並非mutually exclusive，一個人可以同時係兩種或者全部都係。如果你係真心關心香港真求變嘅，呢堆人一開始已經唔係你同路人。香港人唔認清左膠真面目，繼續比佢地主宰香港社運就只會繼續失敗落去。

作者：KeeenT（本文章由聚言時報授權提供）