【中秋回到未來】「龍鬚糖」同「啄啄糖」免費畀你換

幾十歲仁從未食過龍鬚糖， 而啄啄糖以前嫌太硬， 少食少食...

不過， 今日不止一次過食盡兩款老餅糖， 更親自落手落腳玩！ 自己糖自己造又好似味道不錯喎。

今日約同豬豬， 子子去油塘大本型玩， 商場一早佈置成懷舊香港模樣。(唔講我以為去咗海洋公園添)

原來這是大本型慶中秋的活動， 就連天台也有一朵大荷花花燈， 不過陽光燦爛， 賞燈又早了5-6小時， 唯有請兩位老闆合照一張相便算。

不過老闆A說:「我唔想影呀！好熱...(畀10秒我好唔好)」， 老闆B:「唔好數！ 唔好數！...10秒就走得？ 係咪？」(雖然兩位老闆話熱， 但一放佢哋任跑， 佢哋又唔怕熱囉， 仲跑到唔肯走添)

今日重點活動便是跟錢師傅學做糖...(師傅你做咗龍鬚糖幾耐呀？)， 師傅:「我做咗30幾年喇， 好老喇...(你個樣似40)...哈哈哈， 講笑呀！」

龍鬚由麥芽糖拉成， 師傅要將麥芽糖拉成絲， 師傅:「1變2， 2變4咁拉...拉14次囉， 咁就大約有一萬八千條絲」(點解師傅心算咁叻？ 我只係識2~2如4咋喎」

龍鬚包入花生粒就完成， 師傅包的脹卜卜， 我包的扁坺坺...(點解咁醜樣？) ， 師傅:「無所謂啦， 都係你自己食返啫...」(你都幾老實架喎！)

(師傅你最多一日包到幾多粒龍鬚糖？)， 師傅:「年青嗰陣1800粒， E家900粒左右啦」

至於啄啄糖非常簡單， 一個鏍絲批， 一個士巴拿， 鑿鑿鑿， 真的連3歲小朋友都識...

我問師傅女兒:「你學咗做啄啄糖幾耐呀？」， 她一邊鑿一邊答:「今日啱啱先嚟幫手咋」(咁又係...我得閒師傅唔介意， 我都想嚟幫手)

香港風光老大街會一直舉行至9月28日， 黃包車， 舊郵筒， 雀籠， 舊信箱可以時光倒流， 古老變時興， 小朋友應該全部未見過，  可能他們反而覺得潮物添。

囝問:「幾時再可以食龍布糖呀？」我答:「係龍嘅鬍鬚， 所以叫龍鬚呀！」， 9月26日， 27日中秋正日， 只要消費滿$100， 就可以免費換取錢師傅手功龍鬚糖及叮叮糖啦！！  (係咪好廣告呀呵？？)

日期：2015年9月18日至9月28日

時間：下午2時至晚上10時

內容：以電子貨幣於「大本型」消費滿指定金額，即可免費換領迷你月餅、「愛‧茶精品」、茗茶薄片禮盒或紅酒等禮品。

數量有限，換完即止。

「粵粹傳承「型」中秋」

日期：2015年9月26日及9月27日 (星期六及星期日)

時間：下午2時至3時

地點：「大本型」地下中庭

內容：中國舞、相聲魔術、兒童粵劇、猜燈謎、龍鬍糖及叮叮糖懷舊小食攤位。

「月滿中秋慶團圓」

日期：2015年9月26日及9月27日 (星期六及星期日)

時間：晚上8時至9時半

地點：「大本型」空中花園

內容：中樂演奏、中式雜技、 LED 舞獅、LED舞火龍及猜燈謎。