【自家製】粟米馬蹄紅蘿蔔竹蔗水

原本都只係想煲馬蹄竹蔗茅根水等小小豬清熱下火，就係我買材料嘅時候，店員嬸嬸就教我加埋粟米同粟米鬚去煲，話個效用更加好，就係咁我就試下煲依個粟米馬蹄紅蘿蔔竹蔗水啦~

材料有竹蔗、茅根、粟米鬚、馬蹄、紅蘿蔔及粟米，份量方面就同店員講大約幾多個人飲，佢就會幫手執啦！

買齊材料就開工~

先將啲竹蔗切開一半，咁就會出味啲呀~

紅蘿蔔及粟米去皮洗淨，切塊~

馬蹄洗淨去皮~

茅根洗淨~

今次新加入嘅粟米鬚，嬸嬸話係新鮮晒乾，所以要先浸洗半個鐘，咁就會乾淨返啦~

所有材料全部放入1.5公升水煲內~

待水滾後先用中火煲30分鐘~

之後轉慢火繼續煲大約1.5小時~

待涼後就飲得，雪凍飲就仲好飲呀~

加左粟米同粟米鬚一齊去煲，個味道又真係唔同啲，完全唔洗加任何糖，都好清清甜甜，飲落有好香嘅竹蔗味之餘，仲有好濃嘅粟米味，真係唔錯。最好就係小小豬都好鐘意飲，仲自動自覺話要飲添。

雖然依煲依個涼茶又真係幾多功夫要做(尤其係去馬蹄皮，真係十萬個唔願意)，不過可以清熱下火同埋潤肺排毒，小小豬又鐘意，咁麻煩少少都要煲下佢呀！