男兒當入樽（占米糕）

浪費土地資源嘅空置率高嘅休憩設施，尤其係籃球場，必須再規劃，一係冇人用/少人用就拆，一係就用綜合運動大樓解決問題。擠出嚟嘅地方就算唔起樓，都應該與時並進，興建其他休憩設施。由於天然地理地質問題規限，香港土地資源嚴重不足，有人無屋住，有屋住唔呢種瘋狂現象已經進入"Old news is always exciting"嘅境界。

香港其實係有好多室外籃球場，即所謂街場，係長期使用率不足，甚至長期冇人用。根據怪獸家長同特首嘅邏輯，在香港做運動員九成九乞米，又冇經濟貢獻(事實上唔係)，係最唔希望自己子女做的職業，除非子女來自離地中產，接受個仔女講"原諒我這一生不羈放縱愛自由"。所以，不會有幾多學生使用。

籃球場最高使用率嘅年代應該是90-00年代，跟隊打波，踩場等等正常過暗角打人好多，亦都成日做。我已經係老一輩的人，唔喜歡咩事都要求警協，球場有球場嘅規矩。政府唔立例，我地就自己決定，自己遵守，呢種行為叫做自律。現今香港社會咩事都唔立例唔得，但又要講公民權，其實係香港人已經唔知道咩叫自律。政府唔係上帝，又點同時滿足所有人?何況上帝根本都做唔到。

90年代早期，要搵一個冇人使用嘅球場，基本上，你等到熄燈，都仲有人用緊。一套男兒當入樽，成為90年代所有青少年嘅夢想。每個人都話自己識得上籃，插花，轉身射籃等等專業籃球員動作。當時更加會有街場仔自稱櫻木，流川，三井等不斷研習花式技巧，射籃一定要穿針。一套動漫反帶起NBA熱潮，帶起打籃球熱潮，米高佐敦就成為當年的NBA標誌!現在30-50歲嘅男士，個個都話會打籃球。但係現今中小學生，放學有咩做?會唔會忙到放學直入ICU?講呢D，套嘢收咗皮啦，永恆譚玉瑛都走咗一段時間。

而加細路放學多數係去補習班，興趣班，做功課，玩電話等等。以前我地放學會去打波打機，抽閃卡，去信和好景智樂等等追日本文化，往往玩到6點幾，做完愛做嘅事先回家。恐怕而家D學生哥要咁做都有難度。

而家D籃球場，平日大多數得班30零歲左右嘅"老人家"打波。年青人平日少出現，假日都係稀有動物級。所以室外籃球場已經冇咩人用，好應該分批拆除，好好利用土地。住屋同其他迎合大媽緊要定打波緊要?現今香港人應該明白咩叫二等公民。況且，都冇咩家長會給子女放學流連街場呢種龍蛇混雜嘅地方，驚死會有黑社會或者壞人帶壞對寶貝仔女(點知自己仔女有機會惡過沉默的赤龍)。況且齋打波冇獎攞根本冇咩作為，學校唔會加分。

今時今日Book街場的規矩係你再走埋去大叫跟隊，會俾人笑你唔識規矩。而家要打波，你必須要先Book場，一講錢就冇人情講，冇互相遷就。一句:我地Book咗場，ends。

咩事都講法律嘅年代，其實只會令好多事情都變得非黑即白，冇彎轉。大家都捉住條法律自我演繹，繹錯都照去馬，大不了就亂拋公民權，社會又點會和諧。而家人與人之間絕對冇感情可言，白紙黑字嘅法律，就係絕對，想讓給你都唔得，一係你輸打贏要，無限拉布囉。

以前，所謂搶場，就係有另一班自以為高手的嘅人，走來挑戰。輸就要離開球場，讓俾贏家繼續享用。這正正係令到大家，香港地香港人打波技術更加有層次，連其他地方都要出Poster宣揚一下。成王敗寇，你心服口服，就算俾人犯你規，你倒地，對方都唔會話你好"久"。而家別人一句Book咗場，你就必須離開球場，你個心唔服。而家好似係只有你打波，冇得比較，冇Invade and Challenge，又點會有進步呢？久而久之就變成部份年青人自以為是，以為自己一定啱，一定係superb，其實你既世界可能只有你自己。黎明話:要挑戰別人，先挑戰自己。一定唔夠啦，贏了自己又點?仲有其他人，再唔可以同自己講"我已經取得階段性勝利，俾D掌聲自己"。我地要進步，係要有里程碑，關關難關關關過，贏自己只係第一關。當年街場就因為街場龍蛇混雜，臥虎藏龍，如果你喺灣仔修頓，你分分鐘有幸遇到香港代表隊係街邊挑你機。

球場必須拆，係因為一個球場可以起一棟樓，但一個球場只能夠同一時間俾10人打波，完全不符合經濟原則。棟樓裡面留2，3層起籃球場就打到你笑啦。世上種種，必須有割捨，先會有將來。年青人或者不明白，要政府做到兩全其美，只係一種理論，其實你做咩都係順得哥情失嫂意啦。香港人最重要嘅核心，其實就係高度自律。英國佬年代，不是靠我地自律，香港一早玩完了。

清潔香港大行動，應該係由我地每一個市民自己先行醒覺，守護我地呢一個家，香港。講咩我交咗稅俾政府，政府要負全責，what a bullshit。你唔好叫政府派人入黎，唔幫你清潔埋你屋企?當年垃圾蟲廣告，其實大家唔係怕罰款，係怕嗰對眼，怕被人歧視，激發自己嘅羞恥心。今日越來越多人都諉過於人，冇羞恥心，會諗到：捉到我先算啦，我交咁多稅就係請你班清潔工人掃地架嘛。你咁諗就仆街啦，交最多稅嘅係班富豪，所謂嘅霸權，所以港豬唔好話政府點解唔將你放喺第一位啦。

作者：占米糕（本文章由聚言時報授權提供）