貼錢返工，相信冇乜人會肯。之但係呢個世界，不旦只有人做，而且仲有人覺得係好威水的事。
有一次，有個客落order，要50萬的貨。呢個客人有10 萬蚊貨數未找，而佢的credit limit 只有50萬。這個情況，一係叫個客找數先，一係叫老闆簽名臨時加大個客的credit到60萬。剛巧接order 的sales 哥哥Steve係新來的，就問經理：「阿陳生過左credit limit ，點好？」本來Steve以為只有兩個方案，正想問好唔好先打電話俾個客。點知未講出口，經理已經二話不說，寫左張十萬蚊的支票，放在枱面。「拎去俾公司先啦，我會叫個客俾返錢我架喇。」Steve當下有d 反應唔過來，十萬蚊都唔係細數目，就算係小小錢，都無理由要自己俾。
Steve心裡面有好多個問號，忍唔住問佢經理，「點解唔叫個客找數先呢？」「呢個係熟客，我識左佢十幾年，我不嬲都話佢知公司有60日數期，但係公司舊年改左做30日，叫我點同個客講呀，大佬，做生意係講個信字，人地買貨就催人找數，以後邊有計傾，後生仔，你唔明架喇！」Steve真係覺得唔明，點解打工仔可以貼錢打工，仲大條道理。
Steve冇反駁佢上司，去左問會計部Sandy 。「Sandy，黃經理寫左張票，話找左陳生條數先喎。」Sandy望一望Steve，嘴角微微向上，好似想笑出黎咁，就話：「你打左俾陳生未？未就打電話俾佢，話佢知仲有十萬蚊未找啦。」「咁...直接就得架喇？」或者之前張支票出現得太戲劇感，令到Steve猶豫了一會，究竟點同陳生講呢個電話好。
電話講完，陳生叫Steve明天收票，過程也沒有留難過他。Steve舒了一口氣，收返Sandy手上的支票，問：「如果陳生唔肯俾錢住，公司會唔會真係收黃經理張票架？」Sandy無回答，嘴角微微向上，又一副吊你癮的樣子。
Steve坐返去自己個位，黃經理在會議房見客。他又諗起剛才的對話內容「......後生仔，你唔明架喇！......」
貼錢返工，有乜可能會明。
