Facebook群組「香港公路奇觀」昨天(3日)上傳一段港男大罵的士司機的影片，有指該片是由港男上載，希望得到網友的聲援，但他的如意算盤卻打不響。

港男表示他搭乘的士由旺角前往金鐘力寳中心：「司機提議行西隧，我要行紅隧，司機黑面發難，當時我放了兩件貨物在後座，但沒有放於車尾箱；過紅隧收費亭後，司機即按入$25附加費，落車時我問為何收多$5，他說我兩袋貨塞爆他的後座，收$5唔係好過份，最後他俾返錢我，但不斷用“傻仔”來辱罵我，最後還用粗口問候。另外，他一面開車，一面按放於低位的電話，加上赤腳駕駛，非常危險！」

不少網友批評港男的行為，指責他先撩者賤、做法小家和幼稚；更有人明確指出「每件擺放在車尾行李廂內的行李；或每件擺放在車廂內，而長、闊、高總和超過140厘米的行李，乘客均須支付行李附加費」。

部份網友的留言：
「5蚊都要搞咁嘢，5蚊咋，兄弟，男人唔係咁嘅，大方少少啦！」

「勁傻仔！最後佢話“我影曬喇，拜拜！”嘩，簡直係將傻仔兩字演繹得完美無瑕！」

「雖然我好憎的士佬，但的士佬今次好中肯，真係遇傻仔！」

「最傻仔係佢諗住放上網可以平反，點知仲比人插多幾嘢！」

「好明顯又係一個諗住乜野都拍下放上網，打算找人支持自己鬧人，但最後證明自己係一個乜野都唔識，覺得世界欠左自己的蠢人。唉! 真係點解現在有咁多蠢成咁的人喜歡公開找人笑自己儍仔。」

「一開始偷拍，就即刻搖腳，証明你都幾拗底！路線嘅嘢，我覺得你真係唔識，行兩條隧道，最後嘅價錢都唔爭得遠，的士佬都只係提供快啲到嘅路線俾你，你唔識咪問吓個司機！」

「其實真係好多人放片上網就以為自己實有人撐，但原來曝露左自己嘅無知，片主同司機既紅西隧爭拗無片無從稽考，所以不便評論，而你果d行李，大家睇片都唔知有幾大件，唔知片主特登唔影定咁啱少少都影唔到，140cm總和就要收費，司機無好實在咁講你知，但已經好有禮貌同你解釋，你一開始就態度勁差咁對人，打份工姐!司機5蚊都免收你，你仲挑釁個司機！」