黃大仙靚靚西餐廳

作為一個全職傻媽，都係要搵啲時候出去玩下，要抖抖氣先得。所以就約左幾位朋友仔一齊去食個豐富晚餐，等我自已充充電呀~

其實開頭朋友仔提意去黃大仙食西廳時，我內心都打左個突，乜黃大仙有西餐食咩？原來就係黃大仙新開嘅崇山商場入面嘅Olive ERA，依度環境都唔錯，仲可以選擇室內同室外進餐添。怕熱的我當然係選擇室內啦...哈哈哈~

我地一坐低就先嚟叫飲品解解渴先，我就叫左椰子芒果冰~

未飲時就已經有好香嘅椰子味，入口飲到淡淡椰子及芒果，都幾清新呀！

我地嘅頭盆嚟啦，先嚟就係海鮮雪山拚盆~

單睇賣相都已經好吸引，款式都有好多，好似有三文魚、生蠔、青口、蜆仔、龍蝦仔、大蝦、赤貝等等，每一樣都好新鮮呀，我真係食唔停口呀...哈哈哈！

香煎蟹餅配青檸醬~

將好多蟹肉混合埋薯蓉一齊煎，都已經好滋味。再配合埋個青檸醬一齊食，真係非常醒胃呀！

椰菜花忌廉湯~

打溶後嘅椰菜花再加上細滑嘅忌廉，所以飲落都已經感到非常幼滑。可能係個人口味關係，我覺得如果可以淡返少少，仲可以帶椰菜花味道，應該會更加好飲！

我地嘅主菜嚟啦...首先就係北京煙烤鴨薄餅~

我都係第一次以Pizza方式食北京烤鴨，估唔到個感覺都幾符意。煙烤鴨片放在薄薄的餅皮上，加上青瓜、京蔥同埋沙律醬，有脆口又有清新嘅感覺。

意式焗西班牙豬肉眼扒~

依個可以話係我全晚至愛，因為個黑毛豬肉眼扒真係超彬身，而且仲入口好JUICE，真係唔覺唔覺我就轉眼間食晒啦...哈哈哈！

炭燒美國極佳牛扒 30 OZ~

由於我唔食牛關係，所以依個牛扒就交由兩位朋友負責。其實當初初見到依個菜時，都真係有啲驚呆，因為份量真係好足夠，完全唔覺得係2人份量呀。朋友仔都好努力咁密密食，佢地話煎得剛剛好，超JUICE之餘啲肉質亦KEEP到很好嫩。

哈哈哈....咁大份我當然都有幫手，我咪就係負責食啲大大粒嘅蕃茄同焗薯。唔好睇佢地只係配菜，其實我覺得佢地個味一啲都唔會比牛扒錯呀~

我地今晚都真係食得好豐富，不過.....嚟食西餐唔食個甜品總係好似欠缺啲嘢咁，所以我就叫左個法式焦糖燉蛋~

個焦糖係好脆但又唔會好甜，而且蛋嘅口感都好滑，真心覺得好好食呀！

哈哈哈...輕輕鬆鬆食左一個開心飯局，食到飽飽咁離開，真係好滿足呢！