MINIONS啫喱糖

LULU妹知道小小豬近期愛上MINIONS，又知道依隻為食豬鐘意食啫喱，所以就買左盒MINIONS啫喱套裝俾佢。有得整又有得食，當然要即刻整嚟食啦~

其實盒MINIONS啫喱套裝都幾靚呀~

一盒內有兩個MINIONS啫喱模同四盒啫喱粉~

MINIONS啫喱模好得意呀，不過係硬模嚟，開頭都有啲擔心整唔到呀~

MINIONS係黃色小兵，原本我係想整黃嘅檸檬味，不過小小豬話想要整藍色藍莓味，所以最後我地都係整藍色小兵啦！

首先倒入一盒啫喱粉~

然後加入300ML熱沸水，慢慢攪拌~

依個時候用另一小杯仔，將30ML熱水同12G魚膠粉攪拌至完全溶解~

最後將魚膠粉液加入啫喱水內，繼續慢慢攪...慢慢攪~

攪拌好後就可以倒入模具內侍涼後 ，放入雪櫃冷藏至啫喱凝固~

我地雪左大約三個鐘，就可以脫模了。由於MINIONS係硬模所以都有啲難度，最後同朋友仔講教，係個底沖一沖熱水，咁就易甩好多啦~

哈哈哈...啲MINIONS真係好得意，如果係黃色應該會仲靚呀~

小小豬已經急不及待食小兵啦~

依盒啫喱係藍莓味，但其實我又真係食唔出有藍莓味，只係食到啲甜品咁啦...哈哈哈！

之前整啫喱糖我都用魚膠粉及粟膠嚟整，只係試下只用魚膠粉，好幸彩都算係成功。啫喱糖個質感同口感都唔錯，只係冇左有加粟膠嗰一種煙韌度，所以下次買唔到粟膠，都一樣可以整到好味啫喱糖食呀！