【日賣2000件】熱辣辣半熟芝士撻 黃昏6點賣晒!

終於有時間去排隊嘆半熟芝士撻， 心諗:「平日未到5點， 應該都無乜人啦」(點知！！ 嚇死...排咗4個舖位， 超過麥當勞添)

一邊排隊， 店員已經對人龍說:「所有半熟蛋糕已經賣晒... 芝士撻每人限買6件」(好彩我今日唔係嚟買蛋糕啫！！)

我問店員:「日日都咁多人排隊㗎？」她很堅定地答:「係呀！每日都咁多」

幸好排隊需時不太耐， 大約35分便到， 不過阿囝說:「點解後面愈來愈多人嘅？」(係呀！好彩我哋嚟得早咋)

大廚馮師傅非常年輕， (不過女同事踢爆:「佢30㗎啦！！」~事業有成囉)， 原來他就是親自到日本拜師學藝做芝士撻。

(咁你學咗幾耐呀？) 馮師傅:「3日， (吓？ 3日就識㗎嗱)， 因為我做咗麵包15年喇」 (真係真人不露相！)

原來新鮮出爐的半熟芝士撻， 師傅教路， 最好等分半鐘才是進食的黃金時間， 因為入口即溶的效果最正喎！！ (仲啱我啦...影幾張相先食就最正)

小朋友亦扮專家大讚:「又軟又好食， 同平時食嗰D蛋撻唔同， 好食好多...爸爸， 我可唔可以再食？」(唔好喇， 我哋半個鐘頭後又食飯啦)

馮師傅:「我哋暫時最多一日只可以做到2000個， E家我吔又要截龍啦， 因為差唔多賣晒， (吓？ E家5點幾咋喎)， 無辦法， 真係唔好意思」

我覺得入口即溶， 略帶芝士微酸的蛋撻， 比芝士蛋糕Size來得細小， 正正可以解「口㾗」的需要， 2-3口KO一個， 層次感又夠。

話時話師傅透露， 他們師承位於茨城県， 有4間分店的コート・ダジュール， 其實我有衝動飛過去試試元祖級的配方， 究竟是更出色， 還是我們香港人青出於藍呢？