Sanrio Game Master優先玩

小小豬又約埋魚子醬及SY哥哥去玩，齊齊去玩轉Sanrio Game Master優先玩呀~

真係未出發先興奮，小小豬係等入場時都已經好心急要入去玩啦~

整個Sanrio Game Master以七個遊戲及三個大影相區為主，玩贏遊戲可以獲得徽章，集齊徽章換終極扭蛋呀！

入場第一個遊戲就係以Patty & Jimmy為主角嘅碌保齡球~

遊戲其實好簡單，係20秒內用4個保齡球推倒3個保齡樽。看似好容易，但其實保齡樽個企位都有點實，要有用啲力度可以用保齡球推到。相信依個遊戲係三個小朋友至愛，因為佢地來來回回玩左十幾次呀~

第二個遊戲就係以Kuromi為主角嘅電擊棒~

15秒內要用電捧行迷宮，其實依個考眼力同定力嘅遊戲小小豬都真係唔多識玩，佢都係志在攪攪陣一番~

玩左兩個遊戲，就嚟到第一個影相位，好靚嘅布甸狗呀~

接住我地就去Twin Stars做主角嘅過三關遊戲~

要係20秒內將4個豆袋撃向牆上嘅圈圈，過到三關就算贏啦~

之後我地就入去由Monkichi為主角嘅彈珠機遊戲~

利用20秒時間將粒鐵珠由起點推到去終點就勝出，依個遊戲係小小豬另一至愛，同SY哥哥來來回回又玩左唔知幾多十次呀...哈哈哈~

離開時見到好少見到嘅企鵝仔，我曾經何時都好鐘意佢呀~

玩左一輪，又係影相時間，依個機械人KITTY真係好鐘意呀~

豆腐人 X Sanrio好特別呀~

我地仲入左KITTY大宅攪攪陣~

影完相又繼續去玩了，嚟到由XO當主角嘅電腦遊戲~

利用10秒時間不停拍拍拍，其實係控制個風筒幫XO 吹番返個靚頭。小小豬都應該都唔多識玩，不過三位小朋友不停拍拍拍，仲三個人拍一部機，場面又真係幾搞笑呀~

之後嚟到Melody嘅砌積木~

20秒內係啲粒粒堆中，搵返啲Melody圖案積木，砌返個Melody樣就成功。其實依個GAME都幾好玩，不過由於張枱對小朋友嚟講又真係高左啲，又冇提供腳踏，所以抱住小小豬嚟玩...我又真係辛苦左啲啲，所以只係玩左幾次呀~

嚟到今年新加入Sanrio嘅蛋黃哥啦，未玩GAME前影下相先，懶洋洋嘅樣，真係好可愛呀~

20秒內需要將蛋黃哥成功拋反轉，咁就贏啦。其實個鑊都真係幾重，小小豬拎住都好吃力，佢又點可以拋反轉呀，所以都係志在攪攪陣啦~

臨離開前就係最後一個影相靚位，好大個KITTY扭蛋機呀~

當然依個只係裝飾，不過旁邊都有好多真嘅扭蛋機，可以扭出KITTY唔同精品呀~

臨離開前，當然要睇下今年有咩限定商品，種類都好多，樣樣都勁靚，好想買晒返屋企呀！其實我最想買嘅都係大富翁，不過..由於今日係優先場，為公平起見依個限量1000盒嘅大富翁要活動正式時先可以開始購買，所以同佢擦身而過了~

三位小朋友都究竟緊買咩哦~

開開心心又玩左一個下午，唔覺唔覺我地係入面都玩左差唔多三個鐘，如果唔係因為關門，我想小朋友都一定唔願走呀！

今年玩咁開心，期待下年我地三個小朋友可以一齊齊再去玩過呀~