【棟篤燒雞】旺角酒吧都有好嘢食!! 鐵板兩味

朋友C走來告訴我:「仁！你睇吓隻雞...棟篤企係度上枱架， 係咪好過癮？？」

我有點撥冷水回答:「我兩年前去大中華食過喇~(懶得戚語氣)」朋友C接口:「有火燒住架喎...仲有個鐵板雪糕甜品添」

她推介得如此落力， 當然我一定要去親身感受一下...(我以為食肆位於五金舖林立的新填地街， 原來正正就在朗豪酒店旁邊)

嚴格來說這不是食肆， 而是一間酒吧， 經理Huey說:「我哋係幾間分店之中最細一間」(其實20個位都算大， 好多Cafe都係得10個位啦)

二話不說即時向Huey落單招牌火燒雞， 而店員亦好配合， 一定將雞端到我們面前才「點火」....Yeah！！嗚！嘩！火燒雞只維持約15秒， 「吓？咁快就無架啦？？」

Huey:「咁不如我再重新點多次火畀你？」， 我和阿囝即時點頭:「好呀...好呀！」

我問:「乜唔係一面燒一面食嘅咩？」Huey:「因為怕啲客食得論盡， 所以燒完， 我哋會切開六件畀你哋」(咁就有少少失望喎， 成隻雞企係度畀我食， 好玩好多咁)

說時遲...第二次燒雞表演又完結， 依依不捨， 又不忍心隻雞再被燒第三次， 於是就望著Huey將雞捧回廚房斬件...

這隻棟篤燒雞， 絶對不是「好睇唔好食」， 相反雞髀位因為燒過兩次， 雞皮更加脆， 而且雞肉出奇的滑。 (心諗...點解酒吧都有嫩雞滑肉食...咁正？)

大中華的土匪雞一樣棟篤企， 但那間太街坊， 肉太鹹， 今次竟然酒店戰勝大排檔...唯一美中不足， 就是隻雞太細隻。 (點解唔畀埋個雞頭我睇呢？)

鹹食主角離開後， 鐵板甜品接力上場...店員很快手的將那熱騰騰的朱古力醬， 二話不說淋完在雪糕及布朗尼上。(冰山大火被撲滅了一樣， 好大煙呀！！ )

朱古力布朗尼上托住凍冰冰的雪糕， 再被熱朱古力溶岩照頭淋， 其實感覺似心太軟的內外倒轉版本 (照計應該著數咗， 因為件布朗尼， 同朱古力醬都多好多啦)

我其實不太好布朗尼， 不過朱古力小狂迷則讚到天上有...囝:「好好食呀！爸爸你唔食呀？...(我食雪糕得啦)..咁你唔好食晒喎， 我都好鍾意食架」

酒吧環境確實不錯...可惜「係又影， 唔係又影」的我略嫌燈光暗了一點， 一用閃光人...人人望住， 很影響他人...

地址:旺角新填地街