【自家製】牛油果雪芭

今日又同小小豬一齊嚟親子廚房，做一個簡單易整嘅牛油果雪芭啦~

好多朋友仔都話牛油果係蔬菜水果中最含豐富維生素的，維生素E是超級強嘅抗氧化物，食左就好處多多啦！

不過，唔好話小小豬，就連我自己都唔鐘意食，因為嗰一種口感又真係唔太好食，我唔識形容，但總之就唔係我杯茶。

雖然係唔太好食，但一種咁有益嘅水果都好想俾小小豬食，要吸引多啲唔同營養嘛，剛好係網上見到有一個牛油果雪芭製法，所以同小小豬一齊試整嚟食啦~

首先將一個已成熟牛油果去核及起肉，放入攪拌機內~

然後加入50ML鮮奶~

最後因應個人口味加入蜜糖~

之後就可以用攪拌機攪拌至均勻~

將攪拌好至呈乳霜狀態嘅牛油果CREAM，倒進小樽仔內，原來一個牛油果只做到一杯仔份量呀~

最後再加入少少朱古力碎作裝飾~

最後放入冰箱冷藏4小時就食得啦~

哈哈哈...今晚我地三口子嘅飯後甜品就係杯牛油果雪芭~

坦白講，小小豬對依個牛油果雪芭興趣都不是好大，咁又未至於係抗拒，佢都有食左大半杯，只係問佢下次仲食唔食時，佢會話：MaMi，不如下次我地整其他味呀~

接下嚟嗰半杯當然係我食埋啦，其實個口感都唔算太錯，都真係有雪芭嗰一種效果。牛油果加埋鮮奶同蜜糖一齊食，又真易入口好多，比起單食牛油果已經好好多啦！

雖然小小豬唔算鐘意，不過我亦都算成功左一半，起碼都叫做食左半個牛油果呀。

我估亦都可能今次我依個牛油果唔太熟，生生地就出左嗰一種難以形容嘅味道，等我下次買過熟身嘅牛油果再試下，我估小小豬應該會鐘意多啲啲！