【職業特工隊】一日打足4份工!! 就同你OT @ 挪亞方舟

數數手指， 原來上一次來挪亞方舟已經是6年前的事， 當時SY還要扶住牆邊才識行， 一霎眼他已跑得快過我。

我好想帶正放暑假的阿囝盡情周圍玩， 大玩特玩...我曾經問SY:「你大個想做咩？」， 阿囝一邊玩一邊答:「幪面超人...得唔得？」(其實， 世界乜都有可能， 所以我答佢「得」)

今日帶阿囝去挪亞方舟， 就是「玩返工」， 因為那裡有一個《暑假特工》遊戲， 小朋友可以免費一日打齊四份工。

(正啦！！ 唔係做明星去拍戲...都可以試齊唔同嘅工喎)。

今日相約豬仔齊齊變身打工囝， 第一份工就是烈火雄心去救火...

未救火先上堂， 消防哥哥話:「鎖匙， 毛巾， 手機係逃生三寶...」， 小消防員答:「屋企都燒晒， 唔駛鎖匙都可以返入屋啦」(E家啲小朋友真係叻！)

滅火筒是怎樣操作呢？ 個個小小消防員也被「轟」一聲的大煙， 吸引得非常投入， 不過人人都只是有得睇， 無得玩。 (8個失望的面孔即時出現)

因為我對阿囝說:「一陣間， 媽媽會有危險， 你要救她出嚟， 唔係佢就會被火燒死...」(結果， 佢以為真全程捉到阿太隻手實一實)

本來不太願意當消防員的SY， 全因為可以玩水槍， 而笑到「見牙唔見眼」， 最後更加不肯與水槍講「拜拜」。

打工囝評分: ★★★

打工囝評語: 「好玩， 因為有得射水」

救火完畢後， 便轉一份靜態的工作， 白衣天使湊BB。

我說:「唔該你兩位小護士要聽話， 如果唔係護士長會同你哋打針呀」(豬仔:真係打針？ SY:係真係假？ 打邊度？ )~ 梗係PatPat啦

結果他們也算合作， 玩BB也玩得出神入化， 倒樹蔥， 焗死， 跌死， 啃死...(BB真係慘， 如果ToyStory電影係真人真事， 半夜所有BB企晒出嚟一定投訴)

現實生活中， 男仔當護好像也比較少， 怪難今日兩位打工仔也不太喜歡做護士啦！！

打工囝評分: ★★ 

打工囝評語: 「好悶， 無嘢玩， 仲要同BB沖涼」

之後我們5人齊齊去醫肚...(點解廚房無工返呢？？ 扮食客輕鬆好多喎) ~ 「題外話:」這裡的炒烏冬， 在沒有期待下， 竟然是喜出望外。

現實生活中， 一定沒有人可以同時又當護士， 又做醫生。不過今日兩位打工囝就可以...

同時禍不單行的媽媽們， 早上又要被火圍困， 下午又要變身病君...由小醫生幫忙妙手回春。

望聞問切...阿太 (跟稿)向囝說:「我又痾又嘔阿醫生， (咁你係腸胃炎喇， 飲寶礦力啦！！)」(今日的小醫生一定唔會斷錯症， 因為所有媽媽只可以感冒， 或腸胃炎喎)

之後女醫師講解每個人體內的器官都非常重要， 缺一不可， 誰知當中一位小醫神大聲答:「腎有兩個㗎， 切咗一個都得」(家陣D小朋友反應真快)

我問阿囝:「你哋圍住個公仔做咩呀？ (開刀呀！ 佢係病人呀！)佢咩病要開刀？」阿囝:「唔知喎...姐姐話有三個波， 切走佢就好返， 咁我哋咪切囉。好返晒啦， 無病啦佢」(如果現實係真咁就最好)

(你唔係好驚睇醫生咩？ 你今日唔驚呀？) 阿囝:「我今日係醫生喎， 醫生點會驚醫生呀！！」(咁又未必...爸爸都好驚媽媽啦)

打工囝評分: ★★★★

打工囝評語: 「開刀好得意， 我切咗個波走」

四份工作， 最最最多人參與的， 就是警察。 (乜原來咁多人鍾意做警察？ 咁又係一入職已經2萬蚊喎)

小警察一穿上制服， 不停想拔槍， 但因為是假的原故， 所以他不停問人:「支槍真定假？ 點樣開呀？？」

突然警察哥哥大叫:「有單位漏煤氣」， 有小女警搶答:「陳太暈咗」。

警察哥哥猶豫問:「我無講佢姓陳喎」， 小女警答:「頭先消防員哥哥都係陳太呀！ 」(小朋友真係攪笑)

最後就是SY最最最期待的射槍環節...何謂笑到甩牙， 望一望這位小朋友就知道。

十「飛」子彈一轉眼又練習完， 而今日的四份工作亦全部完成. 我問SY最開心的工作是那一份呢？ 

他答:「梗係警察啦， 又可以射槍， 又可以救人， 又可以捉車， (咩捉車？？)， 頭先個小朋友話警察係做捉車， 捉佢爸爸架車...」(咁又係呀！警察係做E啲㗎)

打工囝評分: ★★★★★

打工囝評語: 「 射槍， 射槍， 射槍， 射槍， 射槍」 (佢真係講足5次)

日期：2015年7月23日至8月30日(逢周四至周日)

時間：上午10時至下午6時

地點：香港新界馬灣珀欣路33號挪亞方舟

入場費 ：成人HK$168；小童及長者HK$138。