ES合金15 高迪安開盒報告

Art Storm 推出的Q版ES合金一度成為各師兄既追捧對象,當中不少如ES02金剛飛天鑽,ES03~05三一萬能俠,ES07天威勇士等已成神物上咗神台供奉,Art Storm更一度成為香港之光,可惜產品不斷既脫期,就好似當年港漫百分百感覺一樣,由十分期待新一期,變成百分百無晒感覺一樣,等到無晒感覺。

最新產品ES15高迪安,動畫的機械設定和天威勇士感覺上差不多,Q版化後感覺更為相似,當日開訂時心情都幾興奮,當日係指年半前,等了又等,直頭已接近遺忘既邊沿,收到派貨通知時已沒多大的感覺,所以近年多次在不同展覽看見ES1x六神合體既灰模,其實都無咩感覺,灰模到開訂,開訂到派貨,分分鐘要三四年,Art Storm真係要好好反省吓,不要讓人把你離棄...!!!

包裝和天威勇士十分接近,相對同系其他,此作較為大盒,配件亦較多,玩賞程度亦較高。以Q版比例來講,這麽細隻可設計到完美合體實值一讚,相比如Evolution Toy 那類較大隻的機體,包括六神合體和巨靈神配UFO,後者竟是要合體先分體, Art Storm已勝一籌。但同時由於配合三合一合體設計,機體內裡完全偷空,加上大部份以PVC膠為物料,合完體都輕飄飄,枉稱ES“合金”!近年Art Storm的ES合金似乎愈來愈唔合金,尤其IQ博士那系更離譜,據聞宇宙大王和隨從整隻以搪膠製作,完全沒有合金,廠方應正視商品說明,鏍絲不算合金一部份啊
!