【流心雙雄!!】芝士「浪」下「浪」下 @ 最動人時光80S

話說某日準備在九龍城坐小巴回家之際， 我發現衙前圍道， 開了一間好型的漢堡包店 :「依！ 個包橙到咁搶眼， 係南瓜嚟架？」

老闆阿林:「係呀！饅頭南瓜包，比其他漢堡包特別啲㗎」(心諗...橫惦3點未食下午茶， 一於食你)

(係咪即叫即整架？) 阿林打開蒸籠說:「你睇吓先...我哋不停蒸住啲饅頭， 熱辣辣架」(饅頭正正合晒我哋兩父子「河車」)

80S由兩位80後年青人合營:「我哋第一次創業咋， 咁啱有一位世叔伯做開中式點心， 所以就諗到用南瓜饅頭做包」(超搶眼...我都被佢吸引到唔上小巴)

之後四眼師傅就將豬扒放入油鑊炸。 (塊豬扒好似手板咁大塊喎...)， 阿林:「特登造大塊啲架」(咁抵食？？ 不過大無用， 等我試下好唔好食最要緊...)

流心芝士肉鬆蛋捲是阿林創作出來， 肉鬆亦試過好多款才揀到。. (有冇秘技架？)「無架， 諗就話難啲， 整就練幾次就得， 無難度」(你講就易， 淨係煮杯麵嘅我， 覺得超難啦)

最犀利莫過於四眼師傅左手煎流心芝士蛋， 右手又煎豬扒， (點解阿林你唔幫手嘅？)， 阿林:「廚房細呀！分工合作囉」(好兄弟！！)

(點解你哋會係有九龍城開漢堡包舖嘅？)阿林:「我同四眼都好鍾意食嘢， E區不嬲多人嚟搵特色嘢食麻， 所以米試吓囉， E家打工環境咁差」

唔該晒！！ 四眼師傅！！ 我們的流心豬扒饅頭完成啦.

四眼還專誠幫我切開， 正正望得到夾在豬扒內的芝士， 搖搖欲墜， 「浪浪吓」...哈哈！！ 輕輕一咬， 芝士順勢封住口腔， 愈咬愈滿足。

因為豬扒略帶微辣， 阿囝:「我想淨係食過包， 豬扒好辣！！」(如果要比較無包嘅漢堡包...好似夾住軟軟綿綿嘅南瓜包， 好食好多咁)

(一日賣唔賣到60個流心南瓜包？) 阿林答:「南瓜包係我哋最好賣呀...最少都賣過百個架...」(唔好意思..睇少咗你哋添)

我本來想點一個包， 一個甜品， 但阿林答:「流心芝士肉鬆蛋捲係甜甜地架， 不過真正蛋糕， 雪糕我哋就無」(啱嘅...不熟不做， 無理由食食下漢堡包， 食芒果糯米糍嘅)

同樣是流心的蛋捲， 可能夾了甜肉鬆， 絶對可以當作甜品食。

蛋及芝士煎得好香， 少少七味粉， 微辣帶甜， 又有爆濃芝士， 雖然立食的位置又焗又熱， 但與芝士談戀愛的動人時光， 絶對食得非常滾動。

(建議不如加把風扇仔...好彩我有杯青蘋果， 唔係企係E個凹位食完個包...真係熱到爆炸㗎)

地址：九龍城衙前圍道

營業時間：12:00-00:00