阿舜，人人都可以紅既年代（柳臣）

阿舜？邊個阿舜啊？娃娃愛天下個個啊！

以前要紅，就要做得好。行業之中最頂級，最傑出既人，先會有機會紅。例如你係歌手，就要唱功了得；你係舞者，就要跳得勁。你係演講，就要講得叻。

而今日要紅，就簡單得多，只要夠「騎呢」。就算你再不倫不類，都可以係網絡世界一炮而紅。你有你睇鍾嘉欣，但係有人愛魯芬！當你以為人人都愛美食既時候，最紅既餐廳卻叫做明將……

十年前行路行到成隻殭屍咁既麥浚龍，今日都可以靠謝安琪既羅生門彈番起身突然搖身一變成為香港既實力派歌手。（呢篇文預左得罪好多人……）

阿舜消失十多年，突然出現，舞技不變，唱功依舊。但得到的待遇卻和十年前截然不同。網上同樣是瘋狂洗版，卻是一遍叫好，受大眾擁戴，仿如勇者重臨大地一般。

這一系列的事件給我帶來兩個反思。

一，今時今日，要出名，真係太容易。

首先，你唔洗做得好。基本上，只要你敢做，又唔怕有機會俾網民網攻，你一定出名。你試諗下，阿舜都上到報紙C1，你只要跳得好過佢，唱得好過佢。你有咩理由唔出名？你唔再需要有好好既朗誦技巧，你今日今時要出名，你只要有特別的朗誦技巧。你可能會覺得，唔係喎！咁係出名被人笑姐！阿舜呢個例子正正話比人聽。就算一開始比人笑，今日出番黎，大家咪又係激稱讚佢堅持，勇敢，正面。今日仲笑佢既人，反而突然間成為網民圍攻既對象。阿舜話你知，這是一個人人都紅既年代。但是，這是最好的時代，也是最壞的時代。

二，今日今日，已經無辦法定義咩叫紅。

以前要判斷一個人出唔出名好簡單，因為過去可以曝光既機會唔多。當你可以係媒體經常出現，你就係紅人。反之，你就算做得幾好，得唔到曝光機會，都係寂寂無名。而到咗今日，你要曝光，實在太多機會。只要自己開個youtube，或者facebook。近乎零成本，就已經可以接觸大眾，能夠聚到自己既支持者。但今日，所謂既紅。可能就只不過係講緊一個星期，甚至一日。一炮而紅，卻也一炮沉淪。而家要等大眾認識你，唔再需要爭取主流媒體報導。網上資料好似洪水一樣，熱爆既速度甚至可以比主流媒體更快。往往係網上炒起左一個人，新聞再去跟進番。但水能載舟亦能覆舟。網絡可以一秒令你爆紅，但一旦下一秒有更爆既人，你就會立即係下一秒消失得無影無踪，仿佛從未出現過一樣。係呢個資訊洪流之中，由網絡所產生出黎既「紅人」，又可以紅幾耐？

這是一個追資訊量的年代，每個人都在追。要紅，好容易；要keep住紅，反而更難百倍。

作者：柳臣（本文章由聚言時報授權提供）