【自家製】龍脷葉三果茶

早幾日去街市買餸時，見到雜貨店嬸嬸又返左啲好靚嘅龍脷葉，見屋企啲涼茶又飲晒，所以就買左一份，連同羅漢果、蘋果同雪梨，煲返個龍脷葉三果茶啦~

材料係有新鮮龍脷葉1兩、雪梨及蘋果各4個、羅漢果一個、紅蘿蔔1個及南北杏1兩~

龍脷葉用浸洗半個鐘後，瀝亁備用~

蘋果及雪梨洗淨後，去核及切細塊~

壓碎羅漢果及洗淨南北杏~

在煲中注入約二公升水，然後加入所有材料~

水滾後，用中火煲四十五分鐘~

話咁快煲好，隔楂後雪凍就好好飲啦~

其實依個涼茶甜甜地，味道都唔錯，但小小豬又係一見到黑卒卒咁就唔多願意飲。依個傻豬依期都鐘意用樽嚟飲水，所以最後我就試將啲涼茶倒入個樽仔內，估唔到佢可以勁快手咁KO左半支，仲話好好飲，真係俾佢笑C~

新鮮龍脷葉性質平和加埋雪梨、蘋果及羅漢果就可以有化痰止咳，清肺利咽之效。而且不寒不燥，大人同小朋友都一樣好啱飲呀！

溫馨提示：藥材依方面都係好因應個人體質，所以記得煲之前了解下自己，或者問下相熟藥材店職員，依個藥方啱唔啱飲呀！