政府的投標遊戲（陳假）

依家啲大公司其實仲洗唔洗貪污呢？

好似中國建築咁，請個前高官返去，假設佢有漏咗啲料出去等間公司知道政府個 game 點玩，有咩漏洞，例如房署唔驗鉛，利用依啲漏洞已經慳唔少錢，再加上對政府投標運作嘅熟悉，要投中標容乜易，分分鐘連過檯底都唔洗諗。

圖片來源: 橄欖啜核

講起投政府標，我就諗起一件激氣咗好多年嘅事。

話說小弟當年（2002年）都參與過投標做某政府部門嘅電腦系統，手續係極度繁複，有時真係唔知得罪佢啲乜，會係啲雞毛鴨蒜嘅地方俾佢抽秤，果陣真係諗如果知佢內部個 game 玩緊乜就好喇。後來成班兄弟日以繼夜，夜以繼日咁去做準備就係為咗答政府啲問題，仲要嘔到個 demo 出嚟投標，我仲記得果陣有2-3個月係無假放，係星期六日都無假放，有日我好開心咁講今晚可以早收工喇，其實果陣係夜晚11點。

真係唔知好采定唔好采，竟然俾我地過關勝出，不過唔好采嘅就係大家都知以後會做到仆街，唔洗指意收工，仲知道單野9成會蝕住做，但係當時係 IT 黑暗時代，有得飲鶴止血已經大把人爭住做，心諗，做到扒街都殺住先喇，當時大家都係諗住釣鹽水拖延死亡時間，等到有日經濟好返都叫有一線生機。

但係係勝出後一個月，政府通知個大判公司（我做果間只係大啲嘅艇仔），同佢講：「你地公司現金流有問題，我地擔心你地公司會有唔穩定情況出現，所以個 project 唔可以俾你地做」。我依家都記得當時有幾嬲，當時起碼10幾廿人做野，做咗咁多野出嚟你先用一個一早就已經可以知道嘅理由嚟 bam 我地，完全就係覺得俾人玩咗鑊甘，所以依件事我係一直記住（後來學咗少少財務知識之後就更加發覺用單一個財務指標斷定財務狀況係好武斷）。

到最近鉛水事件發生，有報道話中國建築投中政府好多標，咁又挑起我條引咪走去睇下中國建築個現金流係咪咁好囉，一睇就見到近4年(2011-2014)每年嘅營運現金流（注1）都係負數，有幾好呀？點解當時我地因為依個理由俾人 bam 不過中國建築就係咁中標呀？同一個理由覺得我地唔隱陣但係點解中國建築就穩陣先？定係房署又驗漏野呀？我係覺得龍門任搬架喇，但係我就唔會用個單一指標一口咬定中國建築財政有問題嘅，不過一間公司連續4年負現金流，總債項/股東權益70(%)，10年之內要供3次股，俾我就一定唔會買佢嘅股票。（絕不構成任何投資意見）

注1 ）營運現金流=『真正收進來的現金 扣掉 真正花出去的現金』，現金流好多時係有照妖鏡作用，用嚟睇下間公司係咪表面賺錢不過就無現金賺到甚至係漏出（現金流為負數）

現金流解釋可參考：

http://www.cmoney.tw/notes/note-detail.aspx?nid=6495

作者：陳假（本文章由聚言時報授權提供）