【大隻仔賣雪糕】日賣十桶!!! 雪糕曲奇餅食得過癮

報紙報導: 「街坊廚神大隻仔Alan， 廣華街開舖賣雪糕三文治」， 大熱天時熱辣辣， 梗係食雪糕最好， 一於即刻飛地鐵去食。

今日帶同雪糕殺手(阿囝)去到百利達廣場， 找Alan集郵兼試食...(因為吳若希第一日無出現， 我又搏下今日見唔見到佢囉)

可能時間尚早， 店員Nicole:「你寫Blog㗎？ 我打畀大隻仔叫佢快D落嚟吓...(佢住附近㗎？)...係呀， 所以好快呀！)

Nicole:「小朋友你試唔試食呀？ 有綠茶， 曲奇， 玫瑰花味， 香蕉， 煙肉...(吓？？煙肉係咪鹹㗎？？可唔可以試？)」

Nicole:「因為個雪櫃啱啱壞咗， 所以要係工場整好先運過嚟， 要晏啲先有得賣...」(我好想試， 不過講真應該唔會買， 因為我都係鍾意食甜味雪糕)

(尋日第一日好唔好生意呀？)Nicole一邊裝雪糕一邊答:「十桶雪糕全部賣晒囉， 清潔吓， 執頭執尾都攪到成11點， 12點呀」(勁呀...好彩我今日早啲嚟啫)

原來除了雪糕有得揀， 曲奇都一樣可以揀:「全部都係大隻仔整㗎， 曲奇有芝士， 紅梅， 雙重朱古力」

(E...玫瑰花點解係白色嘅？) Nicole:「因為我哋無落色素㗎？」

新開張， 所有Topping都可以免費任加， 之後就要每款加$2。今日我們點了曲奇雪糕配雙重朱古力餅。 ($48)

阿囝吃完第一口， 舉起母指說:「好好食！ 值9.9分， (點解唔係十分？)， 無得坐囉」(如果特製一個細細魚柳包紙盒仔裝住食， 更Q更正！)

Nicole話:「通常大啖咬先最好食， (囝你都咬唔好用匙羹啦...囝答:「唔好」)， 係呀...小朋友用匙羹好啲， 佢哋個口仔細啲麻」

之後大隻仔專誠趕到氣來氣喘， 真的不好意思...(你最鍾意邊款曲奇， 搭邊款雪糕？) 經常笑的Alan:「我揀香蕉搭雙重朱古力」

(雪糕同曲奇都係你整㗎？) Alan:「係呀...曲奇就預先整定， 雪糕就E度做...呢角落頭部機囉， (咁米好辛苦做咁多嘢？)...哈哈...少少啦」

(點解你會識整雪糕嘅？) 真人超Nice的Alan:「我之前係美國雪糕店打過工， 我又學過廚， 發現美國興用曲奇餅夾雪糕， 於是就同屋企人試吓係香港開囉」

(你咁忙邊有時間整雪糕呀？) 大隻仔:「唔係好忙啫， E家拍緊套電影， 之後返TVB拍巨輪2， 再會接多套電影...」(哈！我忽然覺得好似娛記上身咁添...)

原來曲奇餅來雪糕， 味道， 味覺夾到不得了. 軟要配硬， 感覺很出。(PS: 大隻仔係咪對得金剛多呢？ 點解某啲角度咁似佢？)

地址：九龍旺角廣華街