荔園遊記

荔園確實係香港人的集體回憶，原址現已成居屋私苑，回憶只能在電視媒體中出現;今年夏天，前荔園老闆兒子打著為港人尋夢的口號，在中環海濱活動空間重新打造荔園讓香港人一起尋找回憶(後記:讓主辦者尋金似啲)!早前有網友發表了一篇荔園搵笨x的文章，今日嘗試拋開呢個印象，親身去感受一番!

1.機動遊戲
過往荔園有UFO，小型過山車，咖啡杯，旋轉木馬，小火車，碰碰車等等，今日荔園都有好小型既木馬和咖啡杯，仲有旋轉鞦韆，但腳長啲都掂地，至於懷舊碰碰車?有但未開...!!!

2.動物園
過往荔園有大笨象，長頸鹿，羊...等等，仲記得好多人無品地餵羊食香口膠，今日荔園只有大笨象和一個小型動物園，但大笨象係假既，大家仲要俾錢買假蕉餵象，掉中個口會叫幾聲，至於個動物園仲犀利，由於要俾錢先入到，加上有膠布圍住睇唔清，隱約見到類似膠波波之類既物料砌成各種動物擺設，搵笨成咁唔見有客，職員最終改以“內有冷氣，不設時限”作招來，可見動物園在炎熱天氣下唯一吸引是有冷氣。

3.攤位
除咗擲䃈磚有啲共鳴，再加上四個以懞面超人，電腦奇俠，小露寶和超力電磁俠為主題的攤位，勉強算是老餅回憶外，其他的竟然有足球小將和小忌廉，再加一些有主題但無主角的攤位，從入口玩到出口，平均每個攤位約$30一次，至於獎品?流到唔流既紙扇公仔之類啦，最平都係掉䃈磚贏綠箭香口膠，每次都係$5，但聽講每條綠箭現時約售$3.5，即係實中都蝕$1.5。

4.經典傳統
鬼屋和恐龍屋算係荔園既經典，周星馳“回魂夜”入面都用過佢地做情節，但相信今日如果周星馳見到肯定會情不自禁講句:“朱西，你攪咩呀?!”，幾十蚊一次既恐龍屋變咗滑梯，有人話間鬼屋細過佢屋企，具體啲講，鬼屋係由兩個貨櫃改裝而成，大細大家心中有數。

總結:
懷著返舊荔園既心態你會失望，部份懷舊嘢做唔返咪算囉，攪唔到動物園冇人怪你，但攪個假動物園仲要人俾錢入去睇就一定有人鬧你。成座恐龍屋擺係度俾人影相其實都好開心，收幾十蚊玩滑梯又係錯晒，我記得以前香煙好平，掉䃈磚大獎係一盒盒香煙，而家煙貴政府又唔俾，咁做唔到又係冇人怪，但變相叫人用$5去博條$3.5既綠箭，又係咪有啲過份咗?拆去入口處既荔園招牌，其實和一般嘉年華冇分別。

今日我最大既成就係，入去影完相懷念完就走，使費全免。