數字人（小雷）

政改表決在即，立法會外多了一批身穿印有號碼Ｔ恤自稱撐政改既數字人，網民話數字人係收錢黎集會既臨記，有人更認為有「慈母」係數字人當中。而我就睇到一種深層次既悲哀。

究竟係咩人會願意捨棄自己既身份，選擇將自己變成一個數字人？

對於一個「人」，身份係何其咁重要？一個人既身份，係一個人自我既表現，選擇捨棄身份，捨棄自我的，還算是一個「人」嗎？

過往有唔少文學家，包括西西，都將香港人形容係「無根」既一群人，而香港只係一整座「浮城」，她似乎不知從哪裡來，又不知道該往何處去。住係呢度既人，潛意識裡都覺得自己用緊既時間同空間，只是借來之物。既然「借」了，就得還，於是他們在人類的原罪之上，又被套上一層由他人強加的枷鎖。

過去的香港人沒有屬於自己既歷史同記憶，沒有過去，就無法預料、掌握將來。他們焦慮，歇斯底里地為生存地努力着。可惜，過去無自我，無身份既香港人，只能夠被別人給他們定義既身份綑綁着。回歸前，他們是「英國殖民地人民」；回歸後，他們是「中華人民共和國人民」。無論回歸前後，他們都只是「人民」，而唔係「公民」。自己既身份應該點樣去定位，他們亦都從無自己話事既份兒，他們從來唔敢為自己爭取甚麼。有更多人甚至根本唔意識到應該為自己去爭取，於是他們又只能「認同現實」，係「無法改變」既「現實」中營營役役，無論他們擁有既物質係幾咁豐盛，他們始終只係「生存」着，而唔係「生活」着。

但係當我地－在香港土生的一輩成長起來後，一切都不同了。我地無上一輩他們果種名為「過去」既包袱，我地敢宣稱自己係「香港人」，而唔係屈從於被強加既「中國人」身份，我地視香港為家，我地唔再「無根」。因此，我地又意識到，我地對呢片土地，呢個亂世，有種不能捨割既責任，於是我地會為自己爭取民主，爭取權利。正因為咁，所以我地唔係單單「生存」着，我地係確確實實咁「生活」着。

身份點解會重要？比如話，我，筆者叫做小雷，雷係英文名Ｒａｙ的中文譯音，而Ｒａｙ係光線既意思。取名小雷，係因為我相信人背負原罪出生，卻有向善的潛力，係黑暗既世界中，我地心中既光會指引我地要走既路。我每個行動，都貫徹着呢個信念，寫文章，係嘗試將我既信念透過寫文章去說服別人。每寫一篇，我都為自已既信念加上一層更深既意義。付出呢種代價，為我既身份加上愈來愈重既份量；反之，好似今日見到既７１號、７２號、７３號就唔同了，佢地只係一個群體中可以隨意更換既零件，數字本就有無限大既含意，你可以由１數到１０，又可以由１數到１０００００００，多一個唔多，少一個唔少，無論號碼係幾多號，都係由人地畀你的，你可以係６７，可以係６９，又可以係６８９。唔鍾意？ｓｏｒｒｙ，你連唔鍾意既權利都無。

「我」，小雷，我敢為自已的身份下定義，我為自已既身份添上意義，所以「我」無法被取代；而７２號衫，聽日就可能有其他人穿上，今日穿７２號衫位哥哥被換掉了，其他人可能仲唔覺眼。將自己變成數字，唔係等同於夾硬將自己變成仿佛不曾存在既幻影嗎？人們需要去尋找自我，應該去肯定自我，咁唔係咩驚世見識，而係「人」生在世最基本既義務吧？但果群只敢躲在號碼背後既懦夫，佢地唔敢有自我，或者唔意識到要肯定自我。君不見佢地都戴黑超口罩，不敢以真面目視人嗎？

你可能話，車，去衝立法會班人都蒙面啦！

咁點同呢？抗爭者面對既係一整個建制機器。抗爭時蒙面，係為左讓自己唔好太過暴露係建制暴力底下，增加政府管治成本，係有充分政治哲學理據支持既非暴力抗爭行動既一環。而數字人講明自己係撐政改，就係企係建制角度去與建制外非受益者對立既位置，佢地面對既係只係保鮮紙膠眼罩既星斗市民，而唔似抗爭者面對有致命裝備既警隊。抗爭者，無論佢只係乖乖遊行示威靜坐，定係勇武到去衝立法會，都總有些在物質、在錢以上既意義。這些意義，是長久的，是經得起考驗的，是不會轉眼即逝的。數字人，你地有甚麼？捨棄重要既身份、自我，只係為左一千數百嗎？

不過與其話數字人唔敢以真面目視人，不如話佢地其實係唔敢以真面目面對自己啦？畢竟呢種悲哀，終究係佢地自己親手製造出來的，係今早出門前，佢地都有過選擇既機會，有過臨時放英國人鳩溶既飛機既權吧？但佢地最後偏偏都選擇了將自己變成數字人，對不？