點解我唔想睇陶傑？（明德偉杰風）

我唔想睇陶傑係因為每次睇完都會覺得佢十分厲害，居然可以將不盡不實既謬論粉飾成大條道理。盲目附和係人類社會既特性，但事到如今，我唔可以繼續坐視不理，最大原因係我睇唔過眼。

「贏在起跑線」可能係一個新口號，但絕對唔係啲咩新既概念。自從人類建立公民社會（Civil Society），階級就開始出現。為咗鞏固階級制度人類創造咗金錢，爵位，資產，宗教等等，哩啲都係用黎傳遞特權比後人同維護階級制度既手段。封建​​主義，種姓同埋遺產都係哩啲手段既例子。哩啲不平等既手段，好似已經不復存在，但其實現今重有好多例子。如果你讀過私立學校，你已經係財富不均既後果，因為你老豆老母比得起錢。係英國幾乎每一個首相都讀過公學（好貴既精英私校）佢地既學生佔據住英國頂尖大學既學位，畢業後控制住英國既政界，商界，法律界。正因為咁勞工人階層既細路，好難入讀公學同埋好既大學，更加難係政商界獲得頂尖工作。階級流動係有可能，但係要上到頂就要用幾代既時間。所以好明顯英國唔係抄中國，而中國亦都冇發明「贏在起跑線」。

至於谷啲細路學野令佢地贏在起跑線既做法，亦都唔係新發明。孟母三遷既故事大家都有聽過，佢證明左一個母親為左谷個細路，可以去到幾盡。其實係香港、中國及亞洲其他國家，更甚遠至海外亞裔家庭，都有哩種谷細路既習慣，哩個情況唔淨係出現係中國，更加唔係中央既原創產物，所以我實在唔明白陶傑點解要出盡奶力咁妖魔化大陸。

陶傑用武俠小說同電視劇做例子，證明點樣可以係缺乏先天條件底下而有所成就。我唔知道虛構人物都可以用作論證，但我用屎忽諗都諗都兩個人物例子，一個係成吉思汗另一個係朱元章。如果虛構例子比歷史人物更加有說服力的話，咁我都諗到兩個人係靠父幹成功既。如果Bruce Wayne係工人家庭長大，佢就唔會有時間摟住塊布係Gotham City道飛黎飛去，因為佢要打兩份工養家同供細妹上大學。如果超人冇超能力，佢就只不過係Clark Kent仲要連女都冇，因為佢帶住副好薯既眼鏡。

照我睇，「讓少數人先富起來」只不過係一個政治口號同美國獨立宣言裡面既“All men are created equal”一樣，都係唔係你咁諗既。“[M]en”指既係白人地主，重最好係Anglo-Saxon，黑人、啡人、黃人、女人都唔係人。而「讓少數人先富起來」指既係，首先開放深圳，上海等既經濟特區再開放其餘中國地區。雖然通常政治改革都會緊隨經濟改革，但係唔一定係全面既，而西方資本主義亦都唔係陶傑所講既咁文明。有錢人並沒有係發左達之後，「即刻建立一套公正的制度，讓多數人也能追上來」。以英國為例，成千年既權力鬥爭，將本來係君主既權力轉移左比國會，而國會既權力核心亦因為工業革命後資本家要求更大政治權，權力由上議院轉移到下議院。果啲資本家並冇令工人既日子好過，之後，Luddites炸爛曬啲工廠，工人既權益先至有政府關注，直至到第一次世界大戰之後先有普選。英國既有錢人，冇建立一套公正的制度令工人能夠趕上，正如貴族冇鋪路啲大老闆上位，所以權利係要自己爭取既。腐敗並不是中國獨有既問題，而西方資本主義國家都可以藏污納垢，只要睇下美國啲私人監獄同埋啲賣廣告既法官就會明白。我唔係話中國冇問題，但係西方資本主義國家唔係烏托邦，而西方資本主義亦都唔係萬能藥。

陶傑話「香港人習慣擁抱中國大陸的詞彙語言」，而「你使用這種語文系統，自然這般見識」。中文既書寫系統，係從官話而黎既，哩種書面語全球華人都用，係白話文既產物。所以好明顯有啲書面語既詞語，係廣東口語裡面唔會用到，而有啲廣東口語裡面獨有既詞彙係唔會用係中文書寫裡面。係清朝末年，中國增加左同西方接觸，新既國家同埋觀念迫使創造新既相應中文詞彙。舉個粵語翻譯既例子，瑞士係粵語裡面好合理，但係用普通話讀，完全同原文唔一樣，雖然係咁，全世界華人都係用瑞士哩個翻譯。其實大部分現代中文詞語都係由日本人翻譯包括：文化、文明、民族、思想、法律、經濟、資本、階級、分配、宗教、哲學、理性、感性、意識、主觀、客觀、科學、物理、化學、分子、原子、質量、固體、時間、空間、理論、文學，美術、悲劇、社會主義、共產主義。因為日本既明治維新比中國既洋務運動徹底，而中國既現代化係晚清遭朝廷阻力，日本需要自行造字。如果照陶傑既思路，咁全球華人都好似日本人咁諗野。

我唔係要阻止人繼續追逐哩個假偶像，我只不過係想叫停哩個自大既人。