【自家製】青紅蘿蔔羅漢果豬骨湯

青紅蘿蔔湯我想大家都一定飲過，依個湯亦都因為係老公及細妹至愛，所以我地成日煲呀！

不過，早前有朋友介紹我加粒羅漢果代替蜜棗，話更加有益同好飲，所以又等我試下先啦~

紅蘿蔔2條、青蘿蔔1 條、豬骨約$40、南北杏適量、羅漢果1粒，我仲加左一條粟米一齊煲添~

青紅蘿蔔洗淨去皮切件~

粟米都一樣切件~

羅漢果洗淨壓碎，南北杏洗淨備用~

豬骨洗淨汆水~

煲內放約3L水，待水滾後加入所有材料~

待水再滾之後，轉用慢火煲約2小時~

最後加鹽調味，就可以飲得啦~

依個湯除左好飲之餘，啲蘿蔔、粟米同埋豬骨又可以代替左一個餸，真係啱晒我依個懶懶的煮婦呀...哈哈哈~

今次試改用羅漢果嚟煲青紅蘿蔔湯又真係唔同啲，飲落甘甘甜甜，我覺得咁仲可以帶出青蘿蔔個味，真係好飲好多呀！