【重遇R2-D2】90分鐘玩盡可樂博物館

今日去參觀可樂廠, 之前SY問:「係咪可以飲好多爆炸(可樂)?」  

我講笑:「我哋去睇可樂博物館, 可能有得飲40年前嘅可樂掛!」(SY:吓!40年喎?仲飲得?)  

其實於可樂廠工作, 應該好「正」, 因為一入大堂, 已經有部可樂機任開任飲, 小朋友最初不夠力, 不能打開雪櫃....  

因為他從未試過開樽裝可樂, 見到櫃門掛了條開瓶匙便大叫:「哦..原來鎖咗, 要用鎖匙開架個雪櫃...」(估唔到佢都幾有邏輯喎) ~<謝謝Ringo協助開門>  

乘搭電梯前, 旁邊竟然有成千上萬板可樂, 機會難得, 咁大個仁, 從未見過如震撼的場面.  

首先我們看到1985年為太空人特別設計的可樂...真的價值連城, 一萬元一罐...(嘩!!太空人真係咁鍾意飲可樂?~名符其實堅離地喎...)  

之後便是SY最開心的試飲時間, 對於這支一反轉就會自動結冰的可樂, 他真的珍而重之, 細細口的不捨得不捨得, 飲完又關蓋, 又再飲又關蓋...

(變咗冰係咪無咁好呀? 阿囝:「唔係呀!一樣咁爆炸...仲好飲咗就真」...(其實問你都多餘, 你實話好飲嘅)  

我最初以為今年是可樂誕生100年, 原來是由直身樽變成弧型樽100年. (其實直身都幾靚吖, 無端端點解要改呢?? 衰...唔記得問)  

阿囝最有興趣, 就是在一系列可樂Tee中, 尋回他自己出生年份的一件.   

原來出前一丁都經常和可樂合作喎...不過最吸引我的反而是普通可樂罐上, 為何會有兩粒微縮可樂呢? (Q到爆..打耳到不得了!)  

當大家以為可樂廠連垃圾桶都是可樂設計之時, 原來這個人等身高的東西, 只是裝飾品. (塞唔落㗎...否則SY又點會肯犧牲他的最愛呢?)  

SY坐著的紅色膠椅, 竟然是由幾百個可樂膠樽環保造成...(我以為好輕, 其實好鬼重手)  

大家有沒有印象當年的膠樽可樂, 雪碧, 芬達底部都有一個顏色膠底 ? (我唔睇返真係唔記得...), 原來因為當年樽底企不到, 所以要額外多加一個托...(唔講真係唔知)  

今日, 重頭戲便是到17樓參觀重新裝修的展覽館, 外場的大樽蓋, 就連阿太也忍不住:「我要影, 我要同個可樂蓋影相!」  

這個展場正中心, 有一個用十數條金屬線條組成的可樂, 樽嘴再爆出紅色的扮可樂上天花板, 阿囝一入門口, 已經大大聲:「嘩!!好大支爆炸」  

嘩!嘩!嘩!...我也不斷讚嘆的不是那金屬線條可樂, 而旁邊, 我小朋友時代看雜誌, 夢寐以求的可樂R2-D2.  

當年《星球大戰》, 我細細個就想要這個遙控R2-D2, 不過香港沒有供應...奇怪....80年代有無糖可樂嗎??  

原來密室入面的才是真身...想不到30年後, 我才可以一張手去輕輕摸R2-D2...是不是再等30年就可以擁有呢?? (R2-D2...我好想帶你返屋企)  

我從前讀小學, 一發現可樂蓋掩可以換禮品, 便不吃午餐, 用飯錢買5, 6支可樂當飯食. (唔係講笑, 飲6支可樂真係可以飽足幾個鐘架)  

當年真的換過很多可樂玩具, 所以今日在場部份收藏我也「曾經擁有」, 可能你會話:「唔好同我講以前, 咁你E家有冇吖?」  

正確!! 因為我的一大袋可樂換購品, 全部於當年搬屋時, 給玩具殺手(家母)一口氣棄掉, 所以, 我今日更加睇到不捨得走.  

最勾超我回憶, 便是這個雪碧櫃, 星戰間尺, R2-D2行路人, 星戰記事薄, 星戰書籤, 我真的全部換過, 我連盛載物品的旅行袋也是飲可樂換回來的...  

望住高矮肥瘦的可樂玻璃樽, 真的所有記憶全部湧出來...  

記得當年包住玻璃樽的招紙不是膠, 而薄身發泡紙, 即是購買新電視機時, 包住螢光幕的白色保護紙...(我最鍾意一條條慢慢撕碎佢, 好過癮的無聊行為)  

點解會有清明上河圖可樂樽?? 一套四款, 又雲石, 又竹藤, 又水晶, 又暗黑...2009年有推出過市面嗎?? 完全未見過的超心動可樂樽.  

今日最開心便是在場內用$5買可樂罐錢罌, 阿囝一"嘟", 蹲下身一摸, 便大叫:「無嘢嘅??」他更下意識大力一按...哈哈!我的可樂罐...即時凹了. (好肉痛....)  

今日絶對大豐收, 又背囊, 又巨型2公升玻璃錢罌, 又杯, 又搖搖...好玩到90分鐘絶對未夠喉, 一定要再Encore 先得

呀!!  

地址：沙田小瀝源源順圍17至19號

報名方法：接待學校及非牟利團體參觀（20人成團，需電話預約）

費用：全免