共嚐分享 極品火鍋晚宴

話說同大肥豬之前拍拖時，每一次出旺角都會去杏花樓，因為佢地嘅石磨製糖水真係勁好味。多年冇見(因為我依家真係少出街)，原來佢地係觀塘開左一間火鍋專門店嘅杏花‧火鍋‧甜品，今次得到邀請嚟參加「共嚐。分享」極品火鍋晚宴， 真係十個正，食得勁滿足呀~

食火煱其實除左材類之外，混醬都係非常重要呀~

係未開始食之前，先嚟飲下啲健康飲品先，依兩款就係紫貝天葵同埋山楂茶~

我一向對山楂茶都興趣不大，所以就選擇飲紫貝天葵。估唔飲落又真係幾有驚喜，味道酸酸的甜度又適中，而且紫貝天葵仲可以去油膩同有減肥作用，真係要學下點煲先得。

首先就嚟個日式刺身拼盤先，有三文魚、帶子、甜蝦、魷魚同玉子，真係既靚又豐富呀~

三文魚同帶子肉質都非常鮮甜，玉子都好軟棉棉。不過最令我深刻的就係魷魚刺身卷，用鮮魷魚包住蟹籽同紫蘇葉，勁有口感之餘味道又帶酸酸的，非常特別呀！

食火煱最重要就係個湯底，今次真係非常滿足，因為兩個湯底都係非常特別，完全冇諗過可以用嚟打邊爐呀！

首先就係一個濃湯魚翅雞鍋，湯底好足料，絕對唔係用素翅，係真魚翅嚟呀~

湯頭味道濃郁，而且魚翅都算多，可以先喝了一碗魚翅雞湯先~

另一款就係胡椒豬肚雞鍋~

豬肚內包住一隻雞，食前職員會為我地先將豬肚剪開~

估唔到豬肚又處理幾好，食落完全唔覺得有那一種膻腥味，而且仲覺得好彈牙添~

飲完兩碗靚湯，就係湯鍋內加多少少湯就可以用來打邊爐啦！

正式開始打邊爐啦，嘩...好多嘢食，好豐富呀~

首先有杏花四式滑(墨魚、蝦肉、鯪魚及牛肉)、仲有白鱔片、脆鯇片、招牌手打三寶丸、鮮豬潤和自家製鳳城水餃及農場時蔬拚盆。其實每一樣都唔錯，不過墨魚滑 及墨魚丸就最得我歡心，真係都非常爽口又彈牙，而且好香墨魚鮮味，真心推介呀(可能亦都因為我地墨魚控啦...哈哈哈)！另外鮮豬潤亦都不錯，新鮮又無腥 味呀~

打邊爐又點可以少左牛啦，不過由於我唔食牛關係，所以我試唔到，不過同行朋友仔們對依兩款牛菜式都大讚呀！

本地手切肥牛，其實單看賣相都覺得好靚，每片牛肉都帶有少少肥膏，朋友仔都話牛味好香濃呀~

「牛之天地雜錦拼盆」用上平時HIGH TEA嘅拼盤上桌，單看賣相都已經非常吸引，仲一次過試到牛的不同部位(有安格斯肥牛、牛柳粒、牛展、牛胸爽、牛坑腩和黑柏葉)。當中最特別就係白色的「牛胸爽」，朋友仔話咬落非常爽口嫩滑，而且牛味濃郁呀~

即食嘅魚腐大皇都係唔錯選擇，魚腐很鮮味，而且不油不膩，味道不錯。係啲食物未熟之前邊食魚腐邊等，都係唔錯方法呀~

超愛依度嘅炸魚皮，炸得非常香脆，比薯片還要香脆，就算食到完場都仍然係脆卜卜~

平日我都好少食炸響鈴，不過今日都食左唔少，因為冇那種"油益味"，而且又好脆口，令我對炸響鈴改觀了~

平時打邊爐都係即食麵為主，今次就有蝦子麵及手打稻庭烏冬~

用蝦子麵嚟打邊爐都係第一次，估唔到又幾好食，等我下次係屋企打邊爐又試下先~

其實食完依個豐富火鍋晚宴，都真係已經有十個飽食，不過一定要食埋依個甜品，因為係好特別嘅薑茶西米皮湯圓~

湯圓皮以西米做成，口感煙韌又有咬口，以芝麻餡料，再配以超濃嘅薑湯，真係好味到停唔到口呀(如果有多幾粒就好啦...哈哈哈)~